ئێران: ژێرخانی سەربازیی ئەمریكا لە هەولێر بە تەواوی وێران كراوە

پەیام

وتەبێژی هێزە چەكدارەكانی ئێران ڕایدەگەیەنێت كە هێرشەكانیان بووەتە هۆی وێرانكردنی تەواوەتی ژێرخانی سوپای ئەمریكا لە شاری هەولێر.

محەمەد ئەكرەمی نیا وتەبێژی هێزە چەكدارەكانی كۆماری ئیسلامیی ئێران لە گفتوگۆیەكی تەلەفزیۆنیدا ڕایگەیاند: لە ئەنجامی هێرشە وردەكانی سوپا و سوپای پاسداران، زیانی توندیان بە بنكە و ژێرخانی سەربازیی ئەمریكا لە ناوچەكە گەیاندووە.

ناوبراو ئاماژەی بەوە كرد "هێرشی ئاسمانی بۆ سەر كووەیت، قەتەر و هەولێر لە ڕێی درۆن و مووشەكەوە توانیویانە ئاڕاستەی ستراتیژییەتی واشنتن بگۆڕن و پەك بخەن".
 
بەپێی وتەی ئەم بەرپرسە سەربازییەی ئێران، زۆربەی بنكە ئەمریكییەكان ئێستا توانای جێبەجێكردنی ئەركەكانی پێشوویان نەماوە، بەتایبەتی لە شاری هەولێر كە ژێرخانی ئەمریكا تێیدا نزیكەی بە تەواوی تێك شكێنراوە.

وتەبێژی هێزە چەكدارەكانی ئێران وتیشی: ئەو گرووپە ئۆپۆزسیۆنانەی لە هەولێر نیشتەجێن و بە دانپێدانی سەرۆكی ئەمریكا بڕێكی زۆر چەكیان بۆ ئەنجامدانی هێرشی زەمینی دژی تاران بۆ دابین كرابوون، ئێستا بە تەواوی لە كار كەوتوون.

وتەبێژی هێزە چەكدارەكانی ئێران ڕایشیگەیاند: هێرشە ئاسمانییەكان پێگە و پێكهاتەی ڕێكخراوەیی ئەو هێزانە كە بە "دژە شۆڕش" وەسفی كردن، كردووەتە ئامانج و زیانی گەورەی بە ژێرخانیان گەیاندووە.

لە نوێترین پێشهاتیشدا، سوپای ئێران ڕاگرتنی هێرشەكانی ڕاگەیاند دوای ئەوەی ئەمریكا هێرشەكانی بۆ سەر ئەو وڵاتە ڕاگرت.