پێش 1 هەفتە
208 جار خوێنراوەتەوە
عێراق.. پڕۆژەی ڕادەستكردنی چەك بە دەوڵەت بەردەوامە و ژمارەیەک گرووپیش ڕەتیدەکەنەوە
پەیام
خانەی ڕاگەیاندنی ئەمنی ڕایگەیاند، كە پڕۆژەی ڕادەستكردنی چەك بە دەوڵەت بە كردنەوەی 854 نووسینگە لە پارێزگاكان بەردەوامە، ئەمەش لەكاتێكدایە بەشێك لە گروپە چەكدارەكان بەهۆی هێرشەكانی سەر حەشدی شەعبی، ڕادەستكردنی چەكەكانیان بە حكومەت بە تەواوی ڕەتدەكەنەوە.
فەریق سەعد مەعن، سەرۆكی خانەی ڕاگەیاندنی ئەمنی ڕایگەیاند، پڕۆژەی سنوورداركردنی چەك بەپێی قۆناغی دامەزراوەیی و دەستووری بەڕێوەدەچێت بۆ چەسپاندنی سەروەریی یاسا.
ئاماژەی بەوەش كرد، قۆناغی یەكەم دروستكردنی بنكەی زانیاری بووە و قۆناغی دووەمیش تۆماركردنی چەكی ناو ماڵانە لە ڕێگەی 854 نووسینگە لە بنكەكانی پۆلیسی پارێزگاكان، جگە لە هەرێمی كوردستان.
مەعن جەختی كردەوە، كە یەكخستنی چەك و بڕیاری ئەمنی لەژێر چەتری دەوڵەتدا، كۆڵەكەی سەرەكیی بنیاتنانی وڵات و بەرزكردنەوەی هەماهەنگیی نێوان دەزگاكانە.
لە لایەكی دیكەوە، بەتایبەتیش دوای هێرشەكانی سعودیە بۆ سەر حەشدی شەعبی، پرسی وەرگرتنی چەكی هێزەكانی "مقاوەمە" ئاستنەگی بۆ دروست بووە و بەشێك لە گرووپە چەكدارەكان ڕایانگەیاندووە، كە ئامادە نین چەكەكانیان ڕادەستی دەوڵەت بكەن، ئەمەش وەك كاردانەوەیەك بەرامبەر هەڕەشەكان و پاراستنی پێگەی خۆیان لە هاوكێشە ئەمنییەكاندا.
لە تۆڕە کۆمەڵایەتیەکان شەیری بکە