نزیكەی 1500 كۆچبەر بە مەلەكردن لە كەناراوەكانی مەغریبەوە گەیشتنە ئیسپانیا

پەیام

نزیكەی هەزار و 500 كۆچبەر بە مەلەكردن لە كەناراوەكانی مەغریبەوە گەیشتنە شاری سبتەی ژێر دەسەڵاتی ئیسپانیا، ئەمەش وەك گەورەترین شەپۆلی كۆچی نایاسایی لە ساڵی 2026دا تۆمار كرا كە فشارێكی زۆری خستە سەر ناوەندەكانی پێشوازیكردن لە شارەكەدا.
 
ئەم لێشاوە گەورەیە بەهۆی گونجاوی كەشوهەواوە بووە، كە وای كردووە كۆچبەران ئەو مەودا دەریاییە ببڕن.

لە بەرامبەردا، هێزەكانی ڕزگاركردن و پاسەوانی مەدەنی ئیسپانیا دەستبەجێ دەستوەردانیان كرد بۆ ڕزگاركردنی دەیان كەس و ڕێگریكردن لەوانی دیكە لە گەیشتن بە كەناراوەكان.

بەپێی ڕاپۆرتە فەرمییەكان، ژمارەیەكی زۆر مێردمنداڵ لەنێو كۆچبەرەكاندا هەبوون، ئەمەش ناوەندەكانی پێشوازیكردنی ڕووبەڕووی تەنگژە و فشارێكی بێوێنە كردووەتەوە.

حكومەتی ئیسپانیا بۆ كۆنترۆڵكردنی دۆخەكە، بڵاوەپێكردنی هێزە ئەمنییەكانی لەسەر سنوورە دەریاییەكان زیاد كردووە و لەگەڵ لایەنی مەغریبییش هەماهەنگییەكی چڕی بۆ سنوورداركردنی لێشاوی كۆچبەران دەستپێكردووە.

ئەم پەرەسەندنانە لەكاتێكدایە كە ساڵی 2026 بەرزبوونەوەیەكی بەرچاو لە ژمارەی هەوڵەكانی پەڕینەوە بەراورد بە هەمان ماوەی ساڵی ڕابردوو تۆمار كراوە.

ئێستا شاری سبتە بووەتە یەكێك لە سەرەكیترین و دیارترین خاڵەكانی گەیشتن بە خاكی ئیسپانیا لە ڕێگەی دەریاوە، ئەمەش وای كردووە ناوچەكە بكەوێتە ژێر چاودێرییەكی ئەمنی تووندترەوە.