"تڕه‌مپ و نه‌ته‌نیاهۆ سێ بژارده‌یان له‌سه‌ر پرسی ئێران تاوتوێ كردووه‌"

بەرپرسێکی باڵای ئیسرائیلی ڕایگەیاند، دۆناڵد ترەمپ و بنیامین نەتانیاهۆ لە کۆشکی سپی سێ بژاردەیان لەسەر پرسى ئێران تاوتوێ کردووە کە بریتی بوون لە بژاردەی دیپلۆماسی، گوشاری ئابووری و هێرشی سەربازییان بۆ ڕاگرتنی بەرنامە ئەتۆمییەکە. 
لە کۆنگرەیەکی ڕۆژنامەوانی پاش کۆبوونەوەی رۆژی سێشەممەى تڕەمپ و نەتەنیاهوو، ئەو بەرپرسە ئاماژەی بەوە دا کە نەتانیاهۆ هیچ داوایەکی ڕاستەوخۆی لە ترەمپ نەکردووە بۆ ئەنجامدانی هێرش، بەڵکو بڕیاری کۆتایی بۆ سەرۆکی ئەمریکا جێهێڵراوە. بەڵام لە کۆبوونەوەکەدا تاوتوێی سێ بژاردەی سەرەکی کراوە کە بریتی بووە لە ڕێککەوتن لە ڕێگاى دانوستانەوە، بەردەوامیی گەمارۆ و گوشارە ئابوورییەکان، یان هێرشی سەربازیی بەرفراوان، هاوکات نەتانیاهۆ هەندێک بیرۆکەی نوێشی خستووەتە ڕوو. 
ئەم دیدارە لە کاتێکدا بەڕێوەچوو کە پێشتر ترەمپ نیگەرانی خۆی دەربڕیبوو سەبارەت بە دزەپێکردنی زانیاری لەسەر پلانی ئیسرائیل بۆ ئاشکراکردنی زانیاری هەواڵگری نوێ لەسەر دامەزراوەی ژێرزەمینیی ئێران، بەڵام بەرپرسە ئیسرائیلییەکە ڕەتی کردەوە هیچ ئاڵۆزییەک لە نێوانیاندا هەبێت و جەختی لە ئاڵوگۆڕی ئاسانی زانیارییە هەواڵگرییەکان کردەوە.