ژمارەی زیارەتكارانی چلەی ئیمام حسێن بۆ عێراق چوار ملیۆنى تێپەڕاندووە

پەیام

ژمارەی زیارەتكارانی چلەی ئیمام حسێن بۆ عێراق لە ماوەی مانگونیوێكدا چوار ملیۆنى تێپەڕاندووە. 

سەعد مەعن، سەرۆكی شانەی ڕاگەیاندنی ئەمنیی عێراق ئاشكرای كرد لە سەرەتای مانگی موحەڕڕەمەوە تا ئەمڕۆ، واتە لە ماوەی مانگونیوێكی ڕابردوودا، زیاترلە چوار ملیۆن كەس وەك زیارەتكار هاتوونەتە عێراق.

سەعد مەعن ڕایشیگەیاند: زیارەتكارانی چلەی ئیمام حسێن لە 172 رەگەزنامەی جیاواز پێكهاتوون و لە فڕۆكەخانە و دەروازە جیاوازەكانەوە هاتوونەتە نێو عێراق.

وتیشی: پلانی ئەمنی و خزمەتگوزاریی تایبەت بە زیارەتكاران بەردەوامە، پڕۆسەكەش بە ڕێژەیەكی بەرز كۆنترۆڵ كراوە و رێك خراوە.

هاوكات فڕۆكەخانەی نێودەوڵەتیی نەجەف ڕایگەیاندووە: لە 15 رۆژی یەكەمی مانگی سەفەردا 533 گەشتی هاتن و ڕۆشتن تۆمار كراوە، واتە بە تێكڕا رۆژانە نزیكەی 36 فرۆكە گەشتی بۆ فڕۆكەخانەكە، یان لە فڕۆكەخانەكەوە كردووە.

فڕۆكەخانەی نەجەف ڕایشیگەیاندووە: تا ئێستا 80 هەزار و 658 كەس لە ڕێی فڕۆكەخانەكەوە هاتوونەتە عێراق و 55 هەزار و 140 كەسیش لەوێوە نەجەفیان جێ هێشتووە، فڕۆكەخانەكە پێشبینییشی كردووە لەگەڵ نزیكبوونەوەی ڕێورەسمەكانی چلەدا، ژمارەی زیارەتكاران زیاتر ببێت.