ئەمریكا هێزەکانى لە هەولێر کەمدەکاتەوە و سیستمی پاتریۆتیشی كشاندەوە

پەیام

سوپای ئەمریكا دەستی بە كەمكردنەوەی هێزەكانی لە هەولێر كردووە و سیستمی بەرگریی پاتریۆتیشی كشاندەوە.

بەپێی ڕاپۆرتێكی ماڵپەڕی ئەلمۆنیتەر، سوپای ئەمریكا پڕۆسەی كەمكردنەوەی هێزەكانی لە هەرێم دەست پێكردووە و لەو چوارچێوەیەدا سیستمی بەرگریی ئاسمانیی پاتریۆتی لە بنكە سەربازییەكەی نزیك فڕۆكەخانەی نێودەوڵەتیی هەولێر كشاندووەتەوە. 

سەرچاوەكان ئاماژە بەوە دەدەن كە ئەم هەنگاوە لە چوارچێوەی ڕێككەوتنی نێوان واشنتن و بەغدایە بۆ كۆتاییهێنان بە ئەركی هێزە سەربازییەكان تا 30ی ئەیلوولی ئەمساڵ. هەرچەندە ئەم سیستمە لە ڕابردوودا توانیویەتی 95%ی هێرشە مووشەكی و درۆنییەكانی ئێران و گرووپە چەكدارەكان بۆ سەر هەولێر پووچەڵ بكاتەوە، بەڵام ئێستا بەشێكی زۆری كەرەستە قورسەكان گواستراونەتەوە. 

چاودێران دەڵێن ئەمریكا بەدەست كەمیی مووشەكی پاتریۆتەوە دەناڵێنێت، بەجۆرێك نزیكەی 55%ی یەدەگی پاتریۆتەكانی لەدەست داوە و ساڵانە تەنها بڕێكی زۆر كەم مووشەكی نوێ بەرهەم دەهێنێت، ئەمەش وای كردووە واشنتن پێداچوونەوە بە دابەشكردنی هێزەكانیدا بكاتەوە و قورساییەكەی بخاتە سەر ئەو ناوچانەی كە بە ستراتیژیتر دەیانبینێت كە ولاتانی كەنداو و ئوردنن نەك هەرێمی كوردستان.