پارێزگاری كەركووك: دەستنیشانکردنم بە پارێزگار لەسەر ویستی ئەردۆغان بوو

پەیام

پارێزگاری كەركووك ڕایدەگەیەنێت: دەستنیشانكردنم بە پارێزگار ئەنجامی ویستی سەرۆككۆماری توركیا و پاڵپشتی هاوپەیمانیی گەلەوە بوو.

محەمەد سەمعان ئاغا، پارێزگاری كەركووك و سەرۆكی بەرەی توركمانی عێراقی ڕایگەیاند: هەڵبژاردنی پارێزگارێكی توركومانی بۆ كەركووك دوای 102ساڵ بە ویستی ڕەجەب تەیب ئەردۆغان، سەرۆككۆماری توركیا و پاڵپشتی هاوپەیمانیی گەلەوە بووە.

لە وتارێكیدا لە كۆبوونەوەی دەستەی كارگێڕیی یەكێتیی شارەوانییەكانی جیهانیی توركی لە شارۆچكەی قارامان كە هاوكات بوو لەگەڵ ئەندامێتیی فەرمیی شارەوانیی كەركووك لە یەكێتییەكەدا، سەمعان ئاغا ڕەزامەندی و پشتگیریی سەرۆككۆماری توركیا و هاوپەیمانیی گەلی نێوان ئاكپارتی و مەهەپە)ی بە بەردی بناغەی گەیشتنی بە پۆستی پارێزگار زانی و بە گەڕانەوەی پارێزگارێكی توركمان بۆ كەركووك دوای 102 ساڵ وەسف كرد.

لە 10ی ئابی 2024، لە هۆتێل ڕەشید لە بەغداد، یەكێتی گەیشتە ڕێككەوتنێكی دابەشكردنی دەسەڵات لەگەڵ دوو لایەنی عەرەبی و بزووتنەوەی بابلیون، بەو پێیە ڕێبوار تەهای كاندیدی یەكێتییان وەك پارێزگار هەڵبژارد.

پارتی و بەرەی توركمانی و هاوپەیمانیی عەرەبی بایكۆتی كۆبوونەوەكەیان كرد، دواتر بەرەی توركمانی و هاوپەیمانیی عەرەبی بایكۆتەكەیان شكاند و گەڕانەوە كۆبوونەوەكانی ئەنجوومەن. دوای كەمتر لە دوو ساڵ لە بەڕێوەبردنی پۆستی پارێزگاری كەركووك لە لایەن ڕێبوار تەهاوە، لە 16ی مانگی چواری ئەمساڵ محەمەد سەمعان ئاغا، سەرۆكی بەرەی توركمانی بۆ ماوەی حەوت مانگ پۆستی پارێزگاری كەركووكی وەرگرت.