تەرمى ئەو گەشتیارە عەرەبە دۆزرایەوە کە لە ڕووبارى سیرواندا خنکابوو

پەیام

گەشتیارێکی تەمەن ٣١ ساڵی عەرەب، کە باوکی چوار منداڵە، لەکاتی بەسەربردنی پشوودا لە ڕووباری سیروان لە سنووری گوندی ئیمامی زامن خنکا و دوانیوەڕۆى ئەمڕۆ دواى گەڕانێکى زۆر توانرا تەرمەکەی بدۆزرێتەوە.

بەپێی زانیارییەکان، ئەو گەشتیارە لەگەڵ دوو خێزاندا بە مەبەستی بەسەربردنی پشووەکانیان و مانەوە بۆ چەند ڕۆژێک، سەردانی ناوچەکەیان کردووە. ڕووداوەکە بەشێوەیەکی کتوپڕ بووە، چونکە قوربانییەکە تەنها دە خولەک دوای گەیشتنیان بە شوێنەکە کەوتووەتە ناو ئاوەکەوە و گیانی لەدەستداوە.
دەستبەجێ دوای ڕووداوەکە، تیمەکانی بەرگریی شارستانی و پۆلیسی فریاکەوتنی ١٠٤ گەیشتوونەتە ناوچەکە و دەستیان بە ئۆپەراسیۆنی گەڕان و پشکنین کردووە بۆ دۆزینەوە و دەرهێنانی تەرمەکەی لەناو ڕووبارەکەدا، سەرەنجام توانرا تەرمەکەى بدۆزرێتەوە.