ئەبوزەبی: تائێستا 15 كەشتیمان كراونەتە ئامانج و قوربانیشیان لێكەوتووەتەوە

پەیام 

كۆمپانیای نیشتمانیی نەوتی ئەبووزەبی (ئادنۆك) ڕایگەیاند، لە سەرەتای ململانێكانەوە تا ئێستا 15 كەشتییان لە گەرووی هورمز بوونەتە ئامانجی مووشەك و درۆن، تەنیا لەم هەفتەیەدا سێ هێرشیان كراوەتە سەر و قوربانیی گیانیشی لێ كەوتووەتەوە.

ئەم لێدوانەی كۆمپانیای ئادنۆك لە چوارچێوەی وەڵامدانەوەی ئەو ڕاپۆرتە ڕۆژنامەوانییانەدا هات كە باسیان لە كاریگەریی هێرشەكان لەسەر ئۆپراسیۆنەكانی كۆمپانیاكە دەركرد.

لە بەیاننامەیەكدا كۆمپانیای ئادنۆك ئاشكرای كرد، كە تەنیا لەم هەفتەیەدا سێ كەشتیی نەوتهەڵگریان كراونەتە ئامانج، كە لە ئەنجامدا كارمەندێكی ناو كەشتییەكە گیانی لەدەستداوە و 20 كارمەندی دیكەش بریندار بوون.

كۆمپانیاكە ئاماژەی بەوە كردووە، كە هێرشەكان بە مووشەك و فڕۆكەی بێفڕۆكەوان (درۆن) لە كاتی تێپەڕبوونی كەشتییەكان بە گەرووی هورمزدا ئەنجامدراون.

هەروەها ئادنۆك ڕاشكاوانە ئێرانی تۆمەتبار كردووە بەوەی كە لە پشت ئەم هێرشانەوەیە، بەتایبەت لەم هەفتەیەی دواییدا كە سێ لەو كەشتیانە كراونەتە ئامانج.

بەپێی زانیارییەكانی كۆمپانیاكە، لە سەرەتای دەستپێكردنی شەڕ و ئاڵۆزییەكان لە ناوچەكەدا، بە گشتی 15 كەشتیی سەر بە ئادنۆك ڕووبەڕووی هێرشی جۆراوجۆر بوونەتەوە.