چەندین تەقینەوە لە سەربازگەیەکی سوپای سووریا ڕووی دا و چوار کەس برینداربوون

پەیام
لە ئەنجامی زنجیرەیەک تەقینەوە لە سەربازگەیەکی سوپای سوریا لە باشووری حەلەب، لانیکەم چوار کەس بریندار بوون. 
بەرەبەیانی ئەمڕۆ دووشەممە، زنجیرەیەک تەقینەوەی بەهێز لە سەربازگەیەکی سوپای سوریا لە ڕۆژئاوای شارۆچکەی عیس لە باشووری حەلەب ڕوویاندا، کە بە دووریی نزیکەی ٣٥ کیلۆمەتر لە ناوەندی شارەکەوە دوورە. دەنگی تەقینەوەکان ئەوەندە بەهێز بوون لە گەڕەکەکانی ناو شاری حەلەب، لەوانە گەڕەکی حەمدانییە بیستراون. 
ئاژانسی (سانا) ـی سووری بڵاوی کردەوە کە لایەنە پەیوەندیدارەکان سەرقاڵی لێکۆڵینەوەن بۆ دەستنیشانکردنی سروشت و هۆکاری تەقینەوەکان. بەپێی وتەی فەرماندەی ئۆپەرسیۆنەکانی حەلەب، فەیسەڵ محەمەد عەلی، بەردەوامیی تەقینەوەکان لە سەرەتادا ڕێگری لە گەیشتنی تیمەکانی هاوکاری کردووە، بەڵام دواتر تیمەکانی بەرگریی شارستانی توانویانە بچنە ناوچەکە و چوار بریندار ڕزگار بکەن. 
لەلایەکی دیکەوە، ڕائید ساڵح، وەزیری باری لەناکاو لە سوریا، لە ڕێگەی پلاتفۆرمی "ئێکس" ەوە  هۆشداریی دا لە لێنزیکبوونەوە لە شوێنی ڕووداوەکە و داوای لە هاووڵاتیان کرد ڕێگە بۆ تیمەکانی وەڵامدانەوە چۆڵ بکەن. 
لە ئێستادا تیمەکانی بەرگریی شارستانی سەرقاڵی چۆڵکردنی ماڵەکانی دەوروبەری شوێنی تەقینەوەکە و داخستنی ڕێگە سەرەکییەکانی بەرەو ناوچەکەن، ئەوەش مەبەستی پاراستنی گیانی مەدەنییەکان و ئاسانکاریکردنە بۆ کارەکانی تیمی فریاگوزاری.