بۆری ئاوی دووکان - سلێمانی شکا و چاککردنەوەکەشى سێ ڕۆژ دەخایەنێت

پەیام 

شکانی بۆریی هێڵی دووەمی ئاوی دووکان - سلێمانی لە نزیک ناوچەی قولەرەیسی، بووەتە هۆی پەککەوتنی گەیاندنی ئاو بۆ دەیان گەڕەک و شارۆچکە، چاککردنەوەکەشى نزیکەى سێ ڕۆژى پێدەچێت.

شکانى بۆرییەکە لە کاتێکدایە کە بڕیاربوو ئەمڕۆ سێ پەمپی نوێ بخرێنەکار بۆ چارەسەری کێشەى کەمئاوى لە سلێمانى، بەڵام ئێستا بەشێکی زۆری سنوورەکە بە تەواوی بێ ئاو ماونەتەوە.

بەهۆى شکارى بۆرییەکەوە سەرجەم ئەو گەڕەکانەی دەکەونە دەرەوەی شەقامی بازنەیی مەلیک مەحمود، بەتایبەت ڕۆژهەڵات و باشووری سلێمانی بێئاو دەبن.

هەریەک لە گەڕەکەکانی کوردسات، ئیبراهیم ئەحمەد، کازیوە، وڵوبە، شێخ عەباس، کوردستی و چوارچرا و ناوچەی پیشەسازی، تا چاککردنى بۆرییەکە بێئاو دەبن.

هەروەها گەیاندنی ئاو بۆ شارۆچکەکانی بازیان و تەکیە و قەزای چەمچەماڵ بە تەواوی ڕاگیراوە، لەئێستادا تیمەکانی ئاوی سلێمانی لە شوێنی ڕووداوەکەن و باس لەوەدەکەن چاککردنەوەى بۆرییەکە نزیکەى سێ ڕۆژ دەخایەنێت.