دادگای ئەمریكا دروستكردنی هۆڵێكی ئاهەنگگێڕانی ڕاگرت كە تێچووەكەی 400 ملیۆن دۆلارە

پەیام 

دادگایەكی ئەمریكا ئیدارەی ترەمپی ناچار كرد كارەكانی دروستكردنی هۆڵێكی ئاهەنگگێڕانی 400 ملیۆن دۆلاری ڕابگرێت.

دادگایەكی تێهەڵچوونەوەی ئەمریكا بڕیاری دا ئیدارەی دۆناڵد ترەمپ كارەكانی دروستكردنی هۆڵێكی گەورەی ئاهەنگگێڕان لە كۆشكی سپی ڕابگرێت، كە تێچووەكەی 400 ملیۆن دۆلارە، دادگاكە لە بڕیارەكەیدا جەختی كردەوە كە "هەر سەرۆكێك تەنیا دانیشتوویەكی كاتیی كۆشكی سپییە نەك خاوەنی"، بۆیە بۆی نییە بەبێ ڕەزامەندی كۆنگرێس گۆڕانكاریی جەوهەری لەو شوێنەوارە مێژووییەدا بكات.

ئەم بڕیارە دوای سكاڵایەكی "دامەزراوەی نیشتمانی بۆ پاراستنی شوێنەوارە مێژووییەكان" دێت، كە دژی ڕووخاندنی باڵی ڕۆژهەڵاتی كۆشكی سپی و دروستكردنی هۆڵێكی 8 هەزار مەتر دووجایی وەستانەوە. 

دۆناڵد ترەمپ لە كاردانەوەیەكدا بڕیارەكەی بە "ترسناك، سیاسی و نایاسایی" وەسف كرد و ڕایگەیاند كە ڕاستەوخۆ تانە لە بڕیارەكە دەگرن لە دادگای باڵای وڵات. 

ئەم پڕۆژەیە بەشێك بوو لە هەوڵەكانی ترەمپ بۆ گۆڕینی دیزاینی تەلارە حكومییەكان لە واشنتن، كە پێشتریش بەهۆی بڕیاری دادگاوە ناوی ترەمپ لەسەر ناوەندی كێنیدی بۆ هونەرە نمایشكارییەكان لابرا.