ئێران: گەرووی هۆرموز ناكرێتەوە تا ئەمریكا هەڵسوكەوتی خۆی نەگۆڕێت

پەیام 

ئێران جەخت دەكاتەوە كە گەرووی هۆرموز ناكرێتەوە تا ئەمریكا هەڵسوكەوتی خۆی نەگۆڕێت.

محەمەدباقر زولقەدر ئەمینداری ئەنجوومەنی باڵای ئاسایشی نیشتیمانی ئێران ڕایگەیاند: گەرووی هۆرموز ناكرێتەوە، تا ئەوەی ئەمریكا هەڵسوكەوتی خۆی بەرانبەر ئێران بگۆڕێت و هێرش و جەنگ كۆتایی پێ بهێنێت و سزا و گەمارۆكانیشی لەسەر ئێران هەڵبگرێت.

لە ڕاگەیەنراوێكیدا، محەمەدباقر زولقەدر جەختیشی كردووەتەوە لەوەی گۆڕینی هەڵسوكەوتی واشنتۆن دەبێت لەگەڵ وازهێنانی یەكجارەكی لە هەڕەشەكردن بە هەر زمانێك و سووكایەتی‌ بە پیرۆزییەكانی گەلی ئێران بێت.

ئەمینداری ئەنجوومەنی باڵای ئاسایشی نیشتیمانی ئێران داوای كۆتاییهێنان بە جەنگ و هێرشەكانی ئەمریكا دژی ئێران و هاوپەیمانەكانی لە لوبنان، فەڵەستین، یەمەن و عێراق، هەروەها هەڵگرتنی گەمارۆی دەریایی و كشانەوەی هێزە دەریایی و ئاسمانییەكانی ئەمریكا لە دەوروبەری ئێران كردووە.

زیاد لەوەش، ئەو بەرپرسە ئێرانییە داوای قەرەبووكردنەوەی زیانەكانی جەنگ، هەڵگرتنی گەمارۆكان و ئازادكردنی سامانی بلۆككراوی ئێرانیشی كردووە.

محەمەد باقر زولقەدر ئەمینداری ئەنجوومەنی باڵای ئاسایشی نیشتیمانی ئێران ڕایشیگەیاند: ئەنجوومەنی باڵای ئاسایشی نیشتیمانی ئێران لە مەرجەكانی خۆی پاشەكشە ناكات، چ لە جەنگدا بێت، یان لە گفتوگۆكاندا.