یونیسێف: لە ماوەی ئاگربەستدا 300 منداڵ لە غەززە كوژراون و سەدانی دیكە برینداربوون

پەیام  

بەپێی ئامارێكی ڕێكخراوی یونیسێف لە ماوەی هەر ڕۆژێكی ئاگربەستدا لە كەرتی غەززەی فەڵەستین منداڵێك شەهید بووە.

ڕێكخراوی نەتەوە یەكگرتووەكان تایبەت بە منداڵان ناسراو بە (یونیسێف) ئامارێكی شۆكهێنەری لە بارەی ئاماری قوربانییانی منداڵانی كەرتی غەززەی فەڵەستین بڵاو كردەوە و ڕایگەیاند كە دوای ڕاگەیاندنی ئاگربەست لە ماوەی 10 مانگی ڕابردوودا كە 300 ڕۆژ دەكات،300  منداڵ لە ئەنجامی هێرش و بۆردومانەكانی سوپای قەوارەی زایۆنییەوە شەهید و سەدانی دیكەیش بریندار بوون، كە زۆرینەیان برینەكەیان سەختە.

لەوبارەوە ئێدوارد بیجبیدەر، بەڕێوەبەری ڕێكخراوی یونیسێف لە ڕۆژهەڵاتی ناوەڕاست و باكووری ئەفریقیا، ڕایگەیاند: هەر ڕۆژێك لە دوای ڕاگەیاندنی ئاگربەستەوە منداڵێك لە غەززە كوژراوە.

بیجبییدەر ڕایشیگەیاند: هێشتا منداڵانی كەرتی غەززە چاوەڕوانی كۆتاییهاتنی ڕاستەقینەی ئەو توندوتیژییەن كە پێشتر بەڵێنیان پێ درابوو. 

بەپێی قسەی بەرپرسەكەی یونسێف جگە لە مەترسی هێرش و بۆردومان، هێشتا منداڵانی غەززە ڕووبەڕووی بەدخۆراكیی توند و نەخۆشی و كەمبوونی ئاوی پاكی خواردنەوە و نەبوونی سیستمی ئاوەڕۆ دەبنەوە كە بە تەواوی ژیانیان دەخاتە مەترسییەوە.

لە نوێترین ئاماریشدا، وەزارەتی تەندروستیی فەڵەستین ڕایگەیاند: ئاماری كۆی گشتیی قوربانییان بۆ 73 هەزار و 384 شەهید و 174 هەزار و 242 بریندار بەرز بووەتەوە.