کەشتییەکان لە گەرووى بابولمەندەب فێڵ بەکاردێنن تاوەکو لە هێرشەکان پارێزراوبن

پەیام 

 کەشتییە نەوتهەڵگرەکان بۆ دووركەوتنەوە لە هێرشی حوسییەكان لە گەرووى بابولمەندەب پەنا دەبەنە بەر فێڵكردن.

ئاژانسی بلومبێرگ ئاشكرای كردووە كە کەشتییەکانى نەوت بۆ دووركەوتنەوە لە هێرشی حوسییەكان، پەنا بۆ فێڵی گۆڕینی شوێنی مەبەست دەبەن.

كەشتییەكان بۆ باركردنی نەوتی سعوودیە دەچنە بەندەرەكان، بەڵام لە ئامێرەكانیاندا ناوی میسر یان كەناڵی سویس وەك شوێنی مەبەست دەنووسن بۆ ئەوەی نەبنە ئامانج. 

هەندێك لە تانكەرەكان وەك "سی ماجێستی" ئامێرەكانی شوێنكەوتنیان دەكوژێننەوە تاوەكو بە نهێنی لە بەندەرەكانی سعوودیە نەوت باربكەن. 

ئەم ڕێكارانە وەك هەوڵێك لەلایەن كۆمپانیاكانی گواستنەوەی وزە دەبینرێت بۆ پاراستنی كەشتییەكان لەو هێرشە چەكدارییانەی كە لە ناوچەكەدا ڕوودەدەن.

هاوکات داتاكانی كۆمپانیای "كێپلەر" ئاماژە بەوە دەكەن كە جووڵەی تانكەرەكانی نەوت لە گەرووی هورمز بە ڕێژەی 33% دابەزیوە و دوێنێ تەنیا 8 گەشت تۆماركراون، كە زۆربەیان ڕێڕەوی ئێرانییان بەكارهێناوە. 

لە بەرامبەردا، هاتووچۆ لە گەرووی بابولمەندەب بە ڕێژەی 18% زیادی كردووە و گەیشتووەتە 26 كەشتی.