ئەمریكا: ڕێککەوتنى نوێ بۆ كردنەوەی گەرووی هورمز نرخەكانی وزە دادەبەزێنێت

پەیام

ویلایەتە یەكگرتووەكانی ئەمریكا پێشبینی دەكات بەمزووانە ڕێككەوتنێكی كاتی بۆ كردنەوەی گەرووی هورمز واژوو بكرێت، ئەوەش هۆکار دەبێت بۆ دابەزینى نرخەكانی وزە.  

سكۆت بێسێنت، وەزیری گەنجینەی ئەمریكا ڕایگەیاند، پێدەچێت لە چەند كاتژمێری داهاتوودا ڕێككەوتنێك بێتە ئاراوە بۆ كردنەوەی گەرووی هورمز بۆ ماوەی 30 تا 60 ڕۆژ، ئەمەش دەبێتە هۆی دابەزینی نرخەكانی وزە لە جیهاندا. 

بێسێنت ئاماژەی بەوە كرد كە واشنتن لە ڕێگەی ئۆپەراسیۆنی "تووڕەیی ئابوورییەوە" ئێرانی لە ڕووی داراییەوە خنكاندووە، بە جۆرێك ڕێژەی هەڵاوسان لەو وڵاتە گەیشتووەتە 150% بۆ 180% و تاران توانای دابینكردنی مووچەی سوپاكەی نەماوە.

وەزیری گەنجینە جەختی كردەوە كە گەرووی هورمز وەك پێشوو نامێنێتەوە، چونكە ئێرانییەكان وەك خاڵێكی فشار بۆ پەكخستنی دەریاوانی بەكاریان هێناوە. 

ناوبراو ڕوونیكردەوە كە هاوشانی ئۆپەراسیۆنی سەربازیی "تووڕەیی داستانی"، وەزارەتی گەنجینە سەركەوتوو بووە لە جێبەجێكردنی جەنگی ئابووری دژی ئێران. 

ئەم پەرەسەندنانە لە كاتێكدایە كە ئەمریكا هەوڵەكانی چڕكردووەتەوە بۆ بێهێزكردنی تواناكانی تاران و گەڕاندنەوەی سەقامگیری بۆ ڕێڕەوە ئاوییە ستراتیژییەكانی ناوچەكە.