عێراق: سوپا بنكه‌ و باره‌گای گرووپه‌ چه‌كداره‌كان گه‌مارۆ ده‌دات

ڕۆژنامەی "شەرقلئەوسەت" ئاشکرای کرد کە حکوومەتی عێراق پلانێکی بۆ گەمارۆدانی پێگەی گرووپە چەکدارەکان و هەڵوەشاندنەوەی قۆناغ بە قۆناغیان داڕشتووە. 
بەپێی سەرچاوە عێراقییەکان، پلانەکە بڵاوەپێکردنی هێزەکانی سوپا و دژەتیرۆر لە دوای ٣٠ی ئەیلوول لە دەوروبەری ناوەندەکانی ئۆپراسیۆنی گرووپە چەکدارەکان لەخۆدەگرێت، بەتایبەتی لە ناوچەکانی جورف لسەخر کە مۆڵگەی کەتائیبی حزبوڵڵایە و جورف لنەداف کە مۆڵگەی بزووتنەوەی نوجەبایە. ئامانجی سەرەکیی ئەم هەنگاوە سنووردارکردنی جووڵەی پشتیوانی و دانانی خاڵی پشکنینە بۆ چاودێریکردنی گواستنەوەی چەک، مووشەک و فڕۆکەی بێفڕۆکەوان تاوەکو ڕێگری لە هەر چەشنە پێشێلکارییەک بکرێت. لایەنە پەیوەندیدارەکان جەخت دەکەنەوە کە ئەم ستراتیژییەتە بۆ تێپەڕاندنی ئەو ئاڵنگارییە ئەمنییانەیە کە بەهۆی بوونی چەک لە دەرەوەی دەسەڵاتی دەوڵەت دروست بوون. 
بەرپرسانی ئێران نیگەرانیی خۆیان لەبارەی چارەنووسی چەکە ستراتیژییەکان و سەنتەرەکانی فەرماندەیی دەربڕیوە کە ڕاوێژکارانی سوپای پاسدارانی تێدا کار دەکەن، هەروەها بە سەرکردەکانی هاوپەیمانی ئیدارەی دەوڵەتیان ڕاگەیاندووە کە کاتی ئەم هەڵمەتە بەهۆی بارودۆخی ناوچەکە زۆر خراپە. ناوچەی جورف لسەخر وەک ناوەندێکی گرنگی ئۆپراسیۆنەکانی سوپای پاسداران دەبینرێت کە تێیدا کۆگا و کارگەی دروستکردنی درۆن و مووشەک هەن، بۆیە گۆڕینی ئاڕاستەی کۆنترۆڵکردنی ئەم شوێنانە وەک وەرچەرخانێکی جدی لە پێگەی گرووپەکان هەژمار دەکرێت. حکوومەت سوورە لەسەر جێبەجێکردنی ئەم ڕێڕەوە یاساییە بۆ چەسپاندنی سەروەریی وڵات و گەڕاندنەوەی سەرجەم جومگە ئەمنییەکان بۆ ژێر چەتری فەرماندەیی نیشتمانی.