كۆشكی سپی: لێدوانەکەى ترەمپ لەسەر گەرووى هورمز تەنها بۆ گاڵتە بووە

پەیام 

لێدوانێکى سەرۆکى ئەمریکا کە وتبووى گەرووى هورمزى بە خاکى ئەمریکا دەناسێنێت، کاردانەوەى توندى ئێرانى لێکەوتەوە و كۆشكی سپییش دەڵێت: سەرۆك گاڵتەى كردووە.

كازم غەریبئابادی، جێگری وەزیری دەرەوەی ئێران، بە توندی وەڵامی لێدوانەكانی دۆناڵد ترەمپ سەرۆكی ئەمریكای سەبارەت بە گەرووی هورمز دایەوە و ڕایگەیاند: ئەو ناوچەیە بە تویت، فڕۆكەهەڵگر، یان وتاری هەڵبژاردن داگیر ناكرێت. 

غەریب ئابادی جەختی كردەوە "گەرووی هورمز بە ئێرانی دەمێنێتەوە و تەنها بە فەرمانی تاران دەكرێتەوە، یان دادەخرێت"، هەروەها وتیشی: گەمارۆكان لەو ڕێڕەوەدا بەردەوام دەبن تا ئەو كاتەی واشنتۆن لە هەڵوێستەكانی پاشەكشە دەكات.

ئەم كاردانەوەیە دوای ئەوە هات كە دوێنێ هەینی سەرۆكی ئەمریكا ڕایگەیاندبوو كە بەم زووانە گەرووی هورمز وەك "خاكی ئەمریكا" دەناسێنێت.  

دوابەدوای ئەو لێدوانە، بەرپرسێكی كۆشكی سپی بە ڕۆژنامەی "وۆڵ ستریت جۆرناڵ"ی ڕاگەیاند: قسەكانی ترەمپ تەنها "بۆ (شۆخی)، گاڵتە" بوون و مەبەستی ڕاستەقینەی لەپشت نەبووە. 

سەرەڕای ئەمەش، ئێران دووپاتی دەكاتەوە هیچ كەشتییەك بێ مۆڵەت و چاودێری ئەوان ناتوانێت بەو گەرووەدا تێپەڕێت.