سووریا.. فڕۆکەخانەی سەربازیی ئەبووزوھور لە پارێزگای ئیدلب بۆردوومانکرا

فڕۆکەخانەی سەربازیی ئەبووزوھور لە ڕۆژهەڵاتی ئیدلب ڕووبەڕووی چوار هێرشی ئاسمانی بووەوە کە زیانی ماددی بە ڕێڕەوی فڕینی فڕۆکەکان گەیاندووە. 
بەرەبەیانی ئەمڕۆ سێشەممە، چوار هێرشی ئاسمانی ڕێڕەوی فڕۆکەخانەی سەربازیی ئەبووزوھوریان لە ڕۆژهەڵاتی ئیدلب کردە ئامانج، کە ئەمەش یەکەمین بۆردوومانە لە دوای ڕووخانی ڕژێمی بەشار ئەسەد بۆ سەر ئەم شوێنە ئەنجام درابێت. سەرچاوە ناوخۆییەکان ئاماژەیان بەوە کردووە کە پێش هێرشەکە فڕۆکەی سیخوڕی لە ئاسمانی ناوچەکەدا بینراون و دواتر چەندین بۆمب خراونەتە ناو جەرگەی بنکەکە، هەرچەندە هێرشەکە تەنها زیانی ماددی لێ کەوتووەتەوە و هیچ قوربانییەکی گیانی نەبووە. سەرچاوە سەربازییەکان پێشبینی دەکەن ئیسرائیل لە پشتی ئەم بۆردوومانانەوە بێت بە مەبەستی گۆڕینی ئاڕاستەی هێزەکان لە ناوچەکە و ڕێگریکردن لە هەر ئاڵنگارییەک کە ئاسایشی سنوورەکانی باکوور بخاتە مەترسییەوە. 
فڕۆکەخانەی ئەبووزوھور بە یەکێک لە بنکە سەربازییە گرنگەکانی باکووری سووریا هەژمار دەکرێت و بەهۆی هەڵکەوتە جوگرافییەکەیەوە، هەردوو پارێزگای حەلەب و حەما بە ئیدلبەوە دەبەستێتەوە و وەک ڕێڕەوێکی سەرەکی بەرەو بادیەی سووریا دەبینرێت. ئەم بنکەیە لە سەردەمی بەشار ئەسەد سەرۆکی پێشووی سووریادا بنکەیەکی سەرەکیی هێزی ئاسمانی بوو، پاشان لە ساڵی ٢٠١٥ کەوتە دەست ئۆپۆزسیۆن و لە ٢٠١٨ حکوومەت گرتنییەوە، تاوەکو دواجار لە کۆتایی ٢٠٢٤دا جارێکی دیکە لە لایەن گرووپە ئۆپۆزسیۆنەکانەوە کۆنتڕۆڵ کرایەوە. لایەنە پەیوەندیدارەکان جەخت دەکەنەوە کە پاراستنی ئەم جومگە ستراتیژییانە بۆ ڕێگریکردن لە هەر پەککەوتنێکی ئەمنی پێویستە تاوەکو سەقامگیری لە ناوچەکەدا بپارێزرێت.