داواکارییەکان لەبارەی پشکی هەرێم لە بودجەی 2027ى عێراق رادەستی بەغدا کرد

پەیام 

وه‌زاره‌تی دارایی هه‌رێم رایگه‌یاند، پڕۆسه‌ی ئاماده‌كردنی پشكی هه‌رێم بۆ بودجه‌ی 2027ی عێراق كۆتایی هات و پڕۆژه‌كه‌ش ره‌وانه‌ی وه‌زاره‌تی دارایی عێراق كرا.

وەزارەتی دارایی و ئابوری هەرێمی کوردستان لەڕاگەیەنراوێکدا دەڵێت "پاش زیاتر لە مانگێک لە گفتوگۆی چڕ و خەمڵاندنی هەمەلایەنە بۆ خەرجییەکان، داهاتی گشتی و میلاکی گشتی حکومەت، بە فەرمی کۆتاییمان بە پرۆسەی ئامادەکردنی پشکی هەرێمی بۆ پڕۆژە یاسای بودجەی فیدراڵی 2027 هێنا".

ئەوەشیخستووەتەڕوو، پڕۆژەکە بە هەردوو شێوازی کاغەزی و ئەلیکترۆنی (ئۆنلاین)، ڕەوانەی وەزارەتی دارایی حکومەتی فیدراڵ لە بەغداد کرا.

بەپێی راگەیەنراوەکە، لەم پڕۆژەیەدا، سەرجەم شایستە داراییەکان، خواستە دەستورییەکان و پێداویستییەکانی حکومەتی هەرێمی کوردستان بە وردی جێگیرکراون، لەوانە:

-دابینکردنی تەواوی مووچەی فەرمانبەران، خانەنشینانی شارستانی و سەربازی، کەمئەندامانی سەنگەر، زیندانیانی سیاسی و بنەماڵەی سەربەرزی شەهیدان.

-دابینکردنی موچە بۆ خێزانی کەمدەرامەت و هاوتاکردنی موچەی خاوەن پێداویستییە تایبەتیەکان لەگەڵ بەغدا.

-دابینکردنی خەرجییەکانی دەرمان و پێداویستییە تەندروستییەکان.

-جێگیرکردنی مافی پلەبەرزکردنەوەی فەرمانبەرانی هەرێمی کوردستان، کە بۆ چەندین ساڵ بەهۆی قەیرانی داراییەوە ڕاگیرابوو.

-هاوتاکردنی موچەو شایستە داراییەکانی پێشمەرگە.

-هاوتاکردنی مووچەی خانەنشینانی هەرێم لەگەڵ خانەنشینانی عێراق و وەرگرتنی سەرجەم شایستە داراییەکانی پێشویان.

-چارەسەرکردنی بنەڕەتی کێشەی ئەو فەرمانبەر و مووچەخۆرانەی کە بەهۆکاری جیاواز لە سیستمی(UPN)  تۆمار نەکراون یاخود کێشەیان هەیە.

-دابینکردنی بودجەی وەبەرهێنان بۆ پڕۆژە خزمەتگوزارییەکان (الموازنة الاستثمارية).

-بەهەمیشەییکردنی فەرمانبەرانی گرێبەست لە هەرێمی کوردستان.

-دامەزراندنی سێ یەکەمەکان، خاوەن بروانامە باڵاکان، پزیشکانی گشتی و ددان و دەرمانساز و هاوپیشە تەندروستییەکان.

وەزارەتی دارایی و ئابووری جەخت دەکاتەوە کە ئەم ئامادەکارییە چڕ و وردە، دەبێتە بنەمایەکی بەهێز بۆ چارەسەرکردنی بنەڕەتی کێشە داراییە هەڵپەسێردراوەکان و کۆتاییهێنان بە بەربەستەکانی بەردەم شایستە داراییەکانی هەرێم.

وەزارەتی دارایی ڕاشیگەیاندووە،" هیواداریشین لایەنە پەیوەندیدارەکانی حکومەتی فیدراڵ بە هەمان گیانی بەرپرسیارێتی و پاراستنی مافە دەستوورییەکانەوە مامەڵە لەگەڵ پشکی هەرێم لە بودجەدا بکەن ".