ڤانس: گوشاری ئابووری باشترین ڕێگەیە بۆ گۆڕینی تەواوی هەڵوێستەكانی ئێران

پەیام 

جێگری سەرۆكی ئەمریكا ڕایگەیاند: گوشاری ئابووری كاریگەرترین ئامرازە بۆ ڕووبەڕووبوونەوەی دەسەڵاتدارانی ئێران.

جەی دی ڤانس جێگری سەرۆكی ئەمریكا لە میانی بەشداریكردنی لە پۆدكاستێكدا ڕایگەیاند: ڕووبەڕووبوونەوە لەگەڵ ئێران چووەتە قۆناغێكی نوێ و واشنتۆن دەیەوێت لە ڕێگەی ئابوورییەوە تاران ناچار بە ڕێككەوتنێكی نوێ بكات.

ڤانس وتیشی: هەر چەندە گەرووی هورمز وەك كارتی فشار لای ئێرانە، بەڵام ئەمریكا توانیویەتی گواستنەوەی نەوت لەو گەرووەوە بپارێزێت.

جێگری سەرۆكی ئەمریكا جەختی كردەوە كە دابەزاندنی نرخی وزە لە ناوخۆی وڵات و سزادانی تاران لەسەر هێرشكردنە سەر كەشتییە بازرگانییەكان، دەبێتە هۆی دروستكردنی گوشاری توند. 

ئاماژەی بەوەش كرد "ئەم ستراتیژییە وادەكات ئێران لە هەڵوێستەكانی بەرانبەر واشنتۆن و جۆری ئەو ڕێككەوتنەی دەیەوێت، پێداچوونەوە بكات.

ئەم لێدوانانە هاوكاتی ئەوە دێن كە دۆناڵد ترەمپ سەرۆكی ئەمریكا "جەنگێكی ئابووری بێپێشینە"ی دژی ئێران ڕاگەیاند و هەڕەشەی سزای توندی لەو وڵاتانەش كرد كە پشتیوانی لە تاران دەكەن.