هاوسەرۆکی پەیەدە: خەباتەکەمان لە چەکدارییەوە بۆ کارى سیاسی دەگۆڕین

پەیام

غەریب حەسۆ، هاوسەرۆکی پەیەدە ڕایگەیاند، هێزە کوردییەکان لە قۆناغی خەباتی چەکدارییەوە بەرەو خەباتی سیاسی و دەستوری هەنگاو دەنێن.

جەختی لەوەشکردەوە، کە زمانی کوردی لە سوریای نوێدا دەبێتە زمانێکی فەرمی و یەکینەکانی پاراستنی ژنانیش (یەپەژە) پێگەی خۆیان دەبێت. 

وتیشى "بوونی مەزڵوم عەبدی و ئیلهام ئەحمەد لە دیمەشق بە مەبەستی چەسپاندنی ماف و دەستکەوتەکانە".

غەریب حەسۆ، هاوسەرۆکی پارتی یەکێتیی دیموکراتیک (پەیەدە) ئەمڕۆ لە میانی بەشداریکردنی لە ڕێوڕەسمی یادکردنەوەی شەهیدان لە شاری قامیشلۆ، وتارێکی پێشکەشکرد و تێیدا تیشکی خستە سەر ستراتیژی نوێی کورد لە سوریا.

حەسۆ وتى "کورد لە ئێستادا لە قۆناغی گواستنەوەدایە و خەباتەکەی لە شێوازی چەکدارییەوە بۆ کاری سیاسی و دەستوری دەگۆڕێت، تا لەو ڕێگەیەوە مافە نەتەوەییەکان مسۆگەر بکرێن.

هاوسەرۆکی پەیەدە بەڵێنیدا کە لە سوریای نوێدا، زمانی کوردی وەک زمانێکی فەرمی لە دەستوردا دەناسرێت و جێگیر دەکرێت، ئەمەش وەک یەکێک لە دەستکەوتە سەرەکییەکانی خەباتی ساڵانی ڕابردوو.