ئیسرائیل کونسوڵخانەی بەریتانیای لە قودس داخست و دیبلۆماتکارانی دەرکرد

ئیسرائیل داوای لە بەریتانیا کرد کۆنسوڵخانەکەی لە قودسی ڕۆژهەڵات دابخات و دیپلۆماتکارانی بگەڕێنێتەوە، ئەمەش وەک وەڵامێک بۆ سەپاندنی سزاکانی لەندەن بەسەر ئۆردوگا جوولەکەنشینەکانی کەناری خۆراوا. 

بەگوێرەی بەرپرسێکی ئیسرائیلی و سەرچاوەیەکی ئاگادار کە بۆ ئاژانسی ڕۆیتەرز قسەیان کردووە، ئیسرائیل کۆنسوڵخانەی بەریتانیای لە قودسی ڕۆژهەڵات ئاگادار کردووەتەوە کە دەبێت دابخرێت و دیپلۆماتکارە دیاریکراوەکانی لەماوەی ۳۰ ڕۆژدا بگەڕێنێتەوە بەوپێیەی دواتر مۆڵەتی دیپلۆماسییان لەدەست دەدەن. سەرچاوەکە ئەوەشی ئاشکرا کرد کە دەبێت نوێنەرانی بەریتانیا لە نێردەی هەماهەنگی غەززە بە سەرۆکایەتیی ویلایەتە یەکگرتووەکانی ئەمریکا لە ئیسرائیل، هاوشانی دیپلۆماتکارانی بەریتانیا لە ڕامەڵڵا، لەماوەی حەوت ڕۆژدا ئەو وڵاتە جێبهێڵن. 

ئەم ڕێکارانە دوای ئەوە هات کە جیدعۆن ساعر، وەزیری دەرەوەی ئیسرائیل ڕایگەیاندبوو بەریتانیا دەبێت کۆنسوڵخانەکەی لە قودسی ڕۆژهەڵات کە لای دەسەڵاتی فەلەستینی باوەڕپێکراوە دابخات، وەک پەرچەکردارێک بەرانبەر بڕیاری لەندەن بۆ سەپاندنی سزا بەسەر ئۆردوگا جوولەکەنشینەکانی ئیسرائیل لە کەناری خۆراوا. پێشتریش ئیسرائیل چەندین نووسینگەی دیپلۆماسیی لە ڕامەڵڵای پایتەختی ئیداریی دەسەڵاتی فەلەستینی ناچار بە داخستن کردبوو. 

لە هەمان کاتدا، فەرەنسا و کەناداش لەگەڵ بەریتانیا بڕیاریان داوە هاوردەکردنی کەلوپەل لە ئۆردوگا جوولەکەنیشتەجێبووەکانەوە قەدەغە بکەن. بەپێی وتەی سێ سەرچاوە کە ویستوویانە ناوەکانیان ئاشکرا نەکرێت، حکومەتی ئیسرائیل کە پێشبینیی ئەم سزایانەی کردبوو، ڕۆژی چوارشەممە کۆدەبێتەوە بۆ تاوتوێکردنی وەڵامدانەوەی ئەو وڵاتانەی پشتیوانییان لە ڕێکارەکەی بەریتانیا کردووە.