2 کاتژمێر پێش ئێستا
47 جار خوێنراوەتەوە
ئەردۆغان بەنیازە جارێكی دیكە خۆی بۆ سەرۆكایەتی توركیا بپاڵێوێتەوە
پەیام
ڕاوێژكاری باڵای سەرۆككۆماری توركیا ڕایگەیاند ڕەجەب تەیب ئەردۆغان بەنیازی خۆپاڵاوتنەوەیە بۆ خولی داهاتووی سەرۆكایەتی وڵاتەكەی كە بڕیارە لە ساڵی 2028 بەڕێوە بچێت.
ئەم هەنگاوە لە كاتێكدایە كە بەگوێرەی دەستوور دەبێت پەرلەمان بڕیاری هەڵبژاردنی پێشوەختە بدات بۆ ئەوەی ڕێگەی یاسایی بۆ خۆپاڵاوتنی دووبارەی ئەردۆغان خۆش ببێت.
میدیاكانی توركیا لە زاری مەحمەت ئوچوم ڕاوێژكاری باڵای سەرۆككۆماری توركیاوە ئاشكرایان كردووە ئەگەر 360 پەرلەمانتار دەنگ بە ئەنجامدانی هەڵبژاردنی پێشوەختە بدەن ئەوا لە 16ی نیسانی ساڵی 2028 دا پرۆسەكە بەڕێوە دەچێت.
بەپێی یاسا بەركارەكانی توركیا بڕیار وابوو هەڵبژاردنی داهاتوو لە مانگی ئایاری هەمان ساڵدا بكرێت بەڵام بۆ تێپەڕاندنی بەربەستە یاساییەكانی بەردەم ئەردۆغان هەمواركردنەوەی كاتەكە بە پێویست دەزانرێت.
ئەم هەوڵە سیاسییە نوێیەی ئەنقەرە مشتومڕی زۆری لە ناوەندە سیاسییەكاندا دروست كردووە و حكومەت دەیەوێت لە ڕێگەی ڕێككەوتنی ناو پەرلەمانەوە درێژە بە دەسەڵاتی سەرۆكی ئێستا بدات.
چاودێران پێیان وایە ئەم جموجۆڵانە نیشانەی ئامادەكارییەكی پێشوەختەن بۆ پاراستنی پێگەی دەسەڵات لە توركیا و ڕێگریكردن لە هەر گۆڕانكارییەكی كتوپڕ كە ڕەنگە كار بكاتە سەر سەقامگیریی سیاسیی وڵاتەكە لە ساڵانی داهاتوودا.
لە تۆڕە کۆمەڵایەتیەکان شەیری بکە