سودان.. شەڕێكی خێڵەكی 26 كوژراو و دەیان برینداری لێكەوتەوە

پەیام 

بەهۆی ئاڵۆزییەكی خێڵەكییەوە لە ناوچەیەكی نێوان سودان و باشووری سودان، 26 كەس كوژران و 82ی دیكە بریندار بوون.

هێزی ئاسایشی كاتیی نەتەوە یەكگرتووەكان (یونیسفا) لە ناوچەی ئابیی نێوان سوودان و باشووری سوودان ڕایگەیاند، لە ئەنجامی توندوتیژیی نێوان هۆزەكانی دینكا نەگۆك و موسێرییە لە بازاڕی هاوبەشی "ئامیێت"، 26 كەس كوژران و 82 كەسی دیكەش بریندار بوون.

ئەم گرژییانە دوای ئەوە هاتن كە لەم مانگەدا دوو پیاو لە هەردوو هۆزەكە بە جیا كوژران، ئەمەش بووە هۆی هەڵكشانی گرژییەكان.

هێزە نێودەوڵەتییەكە ڕایگەیاند، دەستبەجێ هێزی زیاتریان لە بازاڕەكە و دەوروبەری جێگیر كردووە بۆ هێوركردنەوەی دۆخەكە و غانی كومار، فەرماندەی هێزەكە، ئاماژەی بەوە كرد كە لە پەیوەندی بەردەوامدان لەگەڵ سەرۆك هۆزەكان بۆ ڕێگریكردن لە خوێنڕشتنی زیاتر و هاندانیان بۆ چارەسەری ئاشتییانە.

جێگەی باسە، ناوچەی ئابیی لەدوای جیابوونەوەی باشووری سودان لە ساڵی 2011ـەوە ناوچەیەكی كێشەلەسەرە، ململانێی نێوان ئەم دوو هۆزەیش مێژوویەكی كۆنی هەیە و زۆرجار بەهۆی ناكۆكی لەسەر لەوەڕگە و ئاوی ئاژەڵان، شەڕ و پێكدادانی خوێناوی لێ دەكەوێتەوە.