تڕه‌مپ به‌خێرایی شوێنی حه‌وانه‌وه‌ی جێهێشت و گه‌ڕایه‌وه‌ واشنتن

پەیام
وەزارەتی دەرەوەی ئەمریکا لە ڕێگەی چەند باڵیۆزخانەیەکییەوە لە ناوچەکە، ئاستی هۆشدارییە ئەمنییەکانی بۆ هاووڵاتیانی بەرز کردەوە. وەزارەتەکە ئاماژەی بەوە کردووە کە ناوچەکە بە دۆخێکی ئەمنیی ئاڵۆزدا تێدەپەڕێت و ئەگەری پەرەسەندنی گرژیی چاوەڕواننەکراوی لێ دەکرێت. 
لە ڕاگەیەندراوێکدا کە بەرەبەیانی ڕۆژی یەکشەممە لە پلاتفۆرمی "ئێکس" بڵاوکراوەتەوە، وەزارەتەکە داوای لەو ئەمریکییانە کردووە کە لە ڕۆژهەڵاتی ناوەڕاست نیشتەجێن، لەوپەڕی ئامادەباشی و وریاییدا بن بۆ ئەگەری هەڵوەشاندنەوەی گەشتە ئاسمانییەکان، داخرانی کایەی ئاسمانی و دروستبوونی ئاستەنگ لە گەشتەکانیاندا. هەروەها هانی ئەو کەسانەشی داوە کە لە دەرەوەی ناوچەکەن، بە جدی پێداچوونەوە بە هەر پلانی گەشتکردندا بکەن کە بۆ  ڕۆژهەڵاتی ناوەڕاست یان بە  ڕۆژهەڵاتی ناوەڕاست تێدەپەڕێت. 
لەلایەکی دیکەوە، گەڕانەوەی پێشوەختە و کتوپڕی سەرۆکی ئەمریکا لە هاوینەهەواری کامپ دەیڤدەوە بۆ کۆشکی سپی، دۆخێکی پڕ لە چاوەڕوانی و دڵەڕاوکێی لە واشنتن دروست کردووە. ئەمەش بەتایبەتی دوای ڕووداوی ڕێگریکردنی فڕۆکەیەکی جەنگیی جۆری "ئێف-١٦" دێت لە پێشێلکارییەکی ئاسمانی بەسەر هاوینەهەوارەکەدا. 
ئەم گەڕانەوەیە هاوکاتە لەگەڵ پێشبینییەکان سەبارەت بە ئەگەری تاوتوێکردنی بژاردەی سەربازی دژی ئێران و حوسییەکان. ئەمەش کەمێک پێش گەشتەکەی ترامپ دێت بۆ نیویۆرک بە مەبەستی بەشداریکردن لە کۆبوونەوەکانی کۆمەڵەی گشتیی نەتەوە یەکگرتووەکان و ئەنجامدانی لوتکەیەکی چاوەڕوانکراوی باڵا لەگەڵ سەرکردەی وڵاتانی کەنداو، بۆ تاوتوێکردنی پێشهاتەکان.