پەرلەمانی ئێران تاوتوێی کشانەوە لە پەیماننامەی قەدەغەکردنی چەکی ئەتۆمی دەکات

جێگری سەرۆکی پەرلەمانی ئێران عەلی نیکزاد ڕایگەیاند پەرلەمانی وڵاتەکەی دەستی بە تاوتوێکردنی پڕۆژەیاسایەک کردووە بۆ کشانەوە لە پەیماننامەی قەدەغەکردنی بڵاوبوونەوەی چەکی ئەتۆمی (ئێن پی تی). 
بەپێی ڕاپۆرتێکی ئاژانسی هەواڵی فارسی ئێرانی، جێگری سەرۆکی پەرلەمانی ئێران عەلی نیکزاد ئاشکرای کرد کە پەرلەمان دەستبەجێ دوای وەرگرتنی فەرمیی پڕۆژەیاساکە، دەست دەکات بە تاوتوێکردنی بڕیاری کشانەوە لە پەیماننامەی نێودەوڵەتیی قەدەغەکردنی چەکی ئەتۆمی. ناوبراو ڕوونیشی کردەوە کە پەرلەمان لە پاڵ لایەنە یاساییە ناوخۆییەکاندا، لێکەوتە سیاسی و ڕەهەندە نێودەوڵەتییەکانی ئەو بڕیارەش لەگەڵ لایەنە پەیوەندیدارەکان تاوتوێ دەکات. 
ئەم جموجووڵەی پەرلەمانی ئێران وەک پەیامێکی توند بۆ وڵاتانی ڕۆژئاوا دەبینرێت سەبارەت بە ئەگەری گۆڕینی دۆکتۆرینی ئەتۆمیی ئەو وڵاتە لە کاتی بەردەوامیی فشارەکاندا. ئەم پڕۆژەیاسایە لە کاتێکدایە کە ئێران لە ساڵی ١٩٧٠ەوە ئەندامە لە پەیماننامەی قەدەغەکردنی بڵاوبوونەوەی چەکی ئەتۆمی، بەڵام لە دوای کشانەوەی ویلایەتە یەکگرتووەکان لە ڕێککەوتنی ئەتۆمی و پەرەسەندنی ئاڵۆزییە سەربازییەکان، بەرپرسانی تاران چەندین جار هۆشدارییان دابوو کە ئەگەر هێرش بکرێتە سەر بنکە ئەتۆمییەکانیان، لەو پەیماننامە نێودەوڵەتییە دەکشێنەوە.