پووتین ژمارەی هێزەکانی سوپای ڕووسیای بۆ زیاتر لە دوو ملیۆن بەرزکردەوە

سەرۆکی ڕووسیا ڤلادیمیر پووتین بە مەرسوومێکی نوێی سەرۆکایەتی ژمارەی کارمەندانی سوپای وڵاتەکەی بۆ دوو ملیۆن و ٤٤١ هەزار و ٦٣٠ کەس بەرزکردەوە، کە زیاتر لە ملیۆنێک و نیویان سەربازی شەڕکەرن. 
بەپێی ئەو مەرسوومەی ئێوارەی دووشەممە لە ماڵپەڕی فەرمیی یاساکانی حکوومەتی ڕووسیا بڵاوکرایەوە، سەرۆکی ڕووسیا ڤلادیمیر پووتین فەرمانی دا بە زیادکردنی ١٥ هەزار و ٥٠٠ سەربازی نوێ بۆ ڕیزی هێزە چەکدارەکان و بڕیارەکەش دەستبەجێ لە کاتی واژووکردنیەوە چووەتە بواری جێبەجێکردنەوە. بەمەش ژمارەی گشتیی کارمەندانی سوپای ڕووسیا گەیشتە دوو ملیۆن و ٤٤١ هەزار و ٦٣٠ کەس، کە لەو ژمارەیە ملیۆنێک و ٥٥٠ هەزار و ٥٠٠ کەسیان وەک سەربازی شەڕکەری ئامادەباش لە ڕیزەکانی هێزە چەکدارەکاندا دیاری کراون. 
ئەمە دووەم هەنگاوی لەو شێوەیەی مۆسکۆیە لەماوەی ئەمساڵدا، دوای ئەوەی پووتین لە تەممووزی ڕابردووشدا بە مەرسوومێکی سەرۆکایەتی ژمارەی هێزەکانی سوپای بۆ دوو ملیۆن و ٤٢٦ هەزار و ١٣٠ کەس بەرزکردبووەوە کە ملیۆنێک و ٥٣٥ هەزاریان سەربازی شەڕکەر بوون. ڕووسیا لە دوای دەستپێکردنی جەنگی ئۆکرانیا لە شوباتی ٢٠٢٢ەوە، لە ڕێگەی چەندین بڕیاری لەم شێوەیەوە بەردەوام پێکهاتەی هێزە چەکدارەکانی فراوانتر کردووە بە ئامانجی بەهێزکردنی توانای بەرگری و پڕکردنەوەی پێداویستییە سەربازییەکانی لە بەرەکانی جەنگدا.