تره‌مپ: نیازی سووككردنی سزاكانی سه‌ر ئێرانمان نیه‌

سەرۆکی ئەمریکا دۆناڵد ترامپ ڕاپۆرتێکی ماڵپەڕی ئاکسیۆسی سەبارەت بە ئامادەیی واشنتن بۆ سووککردنی سزاکان و ئازادکردنی پارە بلۆککراوەکانی ئێران ڕەت کردەوە و ڕایگەیاند هیچ پێشنیازێکی لەو شێوەیەی نەکردووە. 
سەرۆکی ئەمریکا دۆناڵد ترامپ لە تۆڕی ترووس سۆشیاڵ بڵاوی کردەوە کە بە هیچ شێوەیەک پێشنیازی سووککردنی سزا و ئازادکردنی پارەی بە ئێران نەداوە، و ڕاپۆرتەکەی بە "هەواڵی ساختە" وەسف کرد و داوای کشانەوەی دەستبەجێی کرد، هەرچەندە ئاماژەی بەوە دا کە تیمەکەی لە ڕێگەی نێوەندگیرەکانەوە گفتوگۆی ناڕاستەوخۆیان لەگەڵ تاران ئەنجام داوە. ترامپ دووپاتی کردەوە ویلایەتە یەکگرتووەکان ڕێگری لە ئێران کردووە ببێتە خاوەنی چەکی ئەتۆمی و هەرگیز دەستی پێی ناگات، هاوکات پێشبینیی سەرکەوتنی خێرای واشنتنی لە ڕووبەڕووبوونەوە لەگەڵ تاران و دابەزینی نرخی گازی کرد. 
پێشتر ئاکسیۆس لە زاری بەرپرسانی ئەمریکاوە بڵاوی کردبووەوە کە ترامپ ئامادەیە لەبەرانبەر هەنگاوی کرداریی تاران لە بەرنامە ئەتۆمییەکەیدا، سزاکان کەم بکاتەوە؛ هاوکات ڕۆژنامەی نیویۆرک پۆست ئاشکرای کردبوو کە نێردەی ئەمریکا ستیڤ ویتکۆف و جارید کۆشنەری زاوای ترامپ لە نیویۆرک لە ڕێگەی نێوەندگیرەکانەوە تاوتوێی ئەگەری کردنەوەی گەرووی هورمزیان کردووە.