ئەکسیۆس: رۆبیۆ داوای لە شاندی ئێرانی کردووە نیویۆرک بەجێبهێڵن

پەیام
لە دوای بێ ئەنجامبوونی دانوستانەکان، مارکۆ ڕوبیۆ، وەزیری دەرەوەی ویلایەتە یەکگرتووەکانی ئەمریکا، داوای لە شاندی ئێرانی بە سەرۆکایەتی عەباس عەراقچی کرد دەستبەجێ خاکی وڵاتەکەی و شاری نیویۆرک بەجێبهێڵن. 
بەپێی زانیارییەکانی ماڵپەڕی "ئەکسیۆس" کە لە سەرچاوەیەکی ئاگادارەوە وەریگرتوون، سەرلەبەیانی ڕۆژی دووشەممە لە کۆشکی سپی گەشبینییەک هەبوو بۆ بەدەستهێنانی پێشکەوتنی زیاتر لە دانوستانەکان لەگەڵ لایەنی ئێرانی، بەڵام  هەمان ڕۆژ ڕوونبووەوە کە گفتوگۆکان هیچ ئەنجامێکیان لێنەکەوتووەتەوە. 
بەرپرسە ئەمریکییەکە ئاماژەی بەوە کردووە لەسەر فەرمانی راستەوخۆی وەزیری دەرەوە، نوێنەرایەتی ئەمریکا لە نەتەوە یەکگرتووەکان بە شاندی ئێرانییان ڕاگەیاندووە کە دەبێت دەستبەجێ نیویۆرک بەجێبهێڵن. بەوهۆیەوە، پاش چەند کاتژمێرێک عەباس عەراقچی و شاندەکەی ڕوویان لە فرۆکەخانە کردووە و بە فڕۆکەیەک بەرەو دەوحە بەڕێکەوتوون. 
لە لایەکی ترەوە، سەرچاوەیەکی ئاگادار تیشکی خستووەتە سەر ئەوەی عەراقچی خۆی بڕیاربوو بۆ تاران بگەڕێتەوە. بەڵام لەگەڵ ئەوەشدا، هەڵوێستەکەی ڕوبیۆ وەک بێڕێزییەکی دیپلۆماسی نائاسایی لەقەڵەمدەدرێت کە قووڵایی بێ متمانەیی نێوان هەردوو وڵات لە سایەی هەوڵە بێئاکامەکان بۆ کۆتاییهێنان بە جەنگ دەردەخات.