ئەمریكا ئامادەكاری بۆ ڕەوانەكردنی 20 هەزار سەرباز دەكات

پەیام

ئەمریكا 20 هەزار سەرباز لەگەڵ سێ فڕۆكەهەڵگر و چەندین كەشتی دیكە ڕەوانەی ڕۆژهەڵاتی ناوەڕاست دەكات.

وەزارەتی جەنگی ئەمریكا ئامادەكارییەكانی بۆ ئەگەری ڕەوانەكردنی سێ كەشتیی فڕۆكەهەڵگر و چەندین كەشتیی تێكشكێنەر بۆ ڕۆژهەڵاتی ناوەڕاست لە مانگی داهاتوودا دەكات.

بەپێی ئەوەی ڕۆژنامەی واشنتن پۆست بڵاوی كردووەتەوە "هەر چەندە تائێستا ئەم هەنگاوە لە چوارچێوەی پلاندایە و بڕیاری كۆتایی لێ نەدراوە، بەڵام سێ كەشتییە فڕۆكەهەڵگرەكە 20 هەزار سەربازی دیكە، لەگەڵ 150 فڕۆكەی جەنگییش لەخۆ دەگرێت".

بەپێی زانیارییەكان كەشتییەكان بریتیین لە جۆرج واشنتن كە ئێستا لە دەریای عەرەبە، جۆرج ئێچ دەبلیو بۆش كە لە زەریای هندییە، سێیەمیشیان تیۆدۆر ڕۆزڤەڵتە كە پێشبینیی دەكرێت زەریای هێمنی بەرەو ڕۆژهەڵاتی ناوەڕاست بڕیبێت.

لەئێستادا كە ئەمریكا 50 هەزار سەربازی لە ڕۆژهەڵاتی ناوەڕاستە بەم هەنگاوە نوێیە ژمارەكە بۆ 70 هەزار بەرز دەبێتەوە.

ئەم پێشهاتە نوێیە لە دوای لێدوانە توندەكانی سەرۆكی ئەمریكا دێت سەبارەت بە ئێران، بەتایبەت ئەوەی كە ڕۆژی پێنجشەممە لە دیدارێكیدا لەگەڵ گۆڤاری تایمدا ئاماژەی بۆ ئەگەری بەرفراوانبوونی هێرشەكانی سەر ئێران لە دوای هەڵبژاردنی نوێكردنەوەی نیوەیی كۆنگرێس كرد، بەڵام پێشبینییش دەكرێت ئەم كەشتیگەلە نوێیە بە ئامانجی فراوانكردنی جەنگ نەبێت، بەڵكوو بۆ پشوودانی هێزە دەریاییەكانی دیكە بێت كە چەندین مانگە لە ناوچەكە.