نزیكەی 60 وڵات سزاكانی سەر ئێران توندتر دەكەن و ڕێكاری نوێ دەگرنەبەر

پەیام 

56 وڵات بەڵێنیان داوە سزا نێودەوڵەتییەكان بەسەر ئێراندا جێبەجێ بكەن و ڕێگری لە پەرەپێدانی بەرنامە ئەتۆمییەكەی بكەن.

56 وڵاتی جیهان، لەنێویاندا ئەمریكا، ئەڵمانیا، فەرەنسا، ژمارەیەك وڵاتی عەرەبی وەك مەغریب و بەحرێن و یەمەن، بەڵێنیان دا لە جێبەجێكردنی سزا نێودەوڵەتییەكان بەسەر ئێراندا بەردەوام بن. 

ئەم بڕیارە دوای ئەوە دێت كە بەپێی میكانیزمی "سناپ باك" یان "بەلەپیتكە"، شەش بڕیاری پێشووی ئەنجومەنی ئاسایش لە 27ی ئەیلوولی 2025ەوە جارێكی دیكە كەوتوونەتەوە كار. 

ئەو وڵاتانە جەختیان لەوە كردووەتەوە كە ڕێوشوێنی توند دەگرنە بەر بۆ ڕێگریكردن لە گەیشتنی هەر جۆرە كەرەستە و تەكنەلۆژیایەك بە تاران كە لە بەرنامە ئەتۆمی و مووشەكە بالیستییەكاندا بەكار بێت.

هاوكات وڵاتانی واژووكار پابەندیی خۆیان دەربڕیوە بۆ ڕێگریكردن لە فرۆشتن یان گواستنەوەی چەك، بەتایبەت فڕۆكە بێفڕۆكەوانەكان بۆ ئێران یان لە ئێرانەوە. 

هەروەها داوایان لە سەرجەم ئەندامانی نەتەوە یەكگرتووەكان كردووە پابەندی بڕیارەكانی ئەنجومەنی ئاسایش بن بۆ بەرگرتن لە بڵاوبوونەوەی چەكی كۆمەڵكوژ. 

هەروەك ئەو هاوپەیمانییە داوایان لە تاران كردووە بگەڕێتەوە سەر پابەندبوون بە بەڵێننامە نێودەوڵەتییەكان و كۆتایی بهێنێت بەو چالاكییانەی كە لەلایەن ئەنجومەنی ئاسایشەوە قەدەغە كراون و بەتەواوی لەگەڵ ئاژانسی نێودەوڵەتی وزەی ئەتۆمدا هاوكاری بكات.