ماكرۆن خۆپیشاندانەكانی فەرەنسا بۆ داخستنی گەرووی هورمز دەگەڕێنێتەوە

پەیام

 ئیمانوێل ماكرۆن، سەرۆككۆماری فەڕەنسا، لە كۆنفرانسێكی ڕۆژنامەوانیی نوێدا ڕایگەیاند كە هۆكاری سەرەكیی تێكچوونی باری دارایی و خۆپیشاندانەكانی وڵاتەكەی بۆ جەنگی نێوان ویلایەتە یەكگرتووەكانی ئەمریكا و ئێران و داخستنی گەرووی هورمز دەگەڕێتەوە.  
ماكرۆن ئاماژەی بەوە كرد، نزمبوونەوەی توانای كڕینی هاووڵاتییانی فەڕەنسی و بەرزبوونەوەی بەرچاوی نرخی وزە و سووتەمەنی، دەرەنجامی ڕاستەوخۆی ئەو ململانێیە سەربازییەیە كە كاریگەریی قورسی لەسەر بازاڕە جیهانییەكان درووست كردووە.

ئەم لێدوانانەی سەرۆكی فەڕەنسا هاوكاتە لەگەڵ شەپۆلێكی فراوانی دوو هەفتەیی ناڕەزایی و خۆپیشاندان لە شارە جیاوازەكانی ئەو وڵاتە بەهۆی گرانیی تێچووی ژیان و بژێویی خەڵك.
ماكرۆن جەختی لەوە كردەوە كە كێشە ناوخۆییەكانی فەڕەنسا لە ڕاستیدا ڕەنگدانەوەی ئاڵۆزییە نێودەوڵەتییەكانن، بەتایبەتی ئەو شەڕەی كە لە ناوچەی ڕۆژهەڵاتی ناوەڕاستدا بەرپابووە و بووەتە هۆی پەككەوتنی گواستنەوەی نەوت، نەك زیادكردنی باج لەلایەن حكومەت یان گۆڕانكاری لە سیاسەتە ئابوورییەكانی.

ئەم وتانەی ماكرۆن لەكاتێكدایە پێشتر دۆناڵد ترەمپ سەرۆكی ئەمریكا لەبارەی خۆپیشاندانەكانی فەرەنساوە ئەوەی ڕاگەیاندبوو كە خۆپیشاندانەكانی ئەو وڵاتەی بۆ زۆربوونی پەنابەران گەڕاندەوە و داواشی كردبوو فەرەنسا سنوورەكانی بەڕووی كۆچبەراندا دابخات.