شاندی نێوەندگیریی قەتەر بە هەماهەنگی لەگەڵ واشنتن گەیشتە تاران

پەیام

شاندی نێوەندگیری قەتەری بۆ گفتوگۆ لەگەڵ بەرپرسانی باڵای كۆماری ئیسلامیی ئێران، گەیشتە تاران.
ئاژانسی فەرمیی ئیرنا گەیشتنی شاندێكی قەتەری بە سەرۆكایەتیی ڕاوێژكاری باڵای سەرۆكوەزیرانی ئەو وڵاتەی بۆ تاران پشتڕاست كردەوە، هاوكات ئاژانسی ڕۆیتەرز لە زاری بەرپرسێكی ئاگادارەوە ئاشكرای كرد كە سەردانەكە بە هەماهەنگی لەگەڵ واشنتن و بە مەبەستی نێوەندگیری لە نێوان ئەمریكا و ئێران ئەنجام دراوە.
پێشتر قەتەر ڕەشنووسێكی ئاشتیی خستبووە بەردەم تاران، بەڵام بەرپرسانی ئێران پێشنیازەكانیان بە نەگونجاو زانیبوو، بەو پێیەی واشنتن داوا دەكات دۆسیەی ئەتۆمی لە سەرەتای دانوستانەكاندا تاوتوێ بكرێت، لە كاتێكدا ئێران مەرجی هەڵگرتنی گەمارۆی سەر بەندەرەكان و هەناردەی نەوتی هەیە.
لە لایەكی دیكەوە، عەباس عەراقچی، وەزیری دەرەوەی ئێران ڕایگەیاندبوو كە لە پەیوەندیدان تا گرەنتی بۆ جێبەجێكردنی دەستپێشخەرییە حەوت ڕۆژەكەی ئێران بدۆزنەوە.
لەم نێوەندەدا دۆناڵد ترەمپ ڕایگەیاند پەیوەندییەكانی جەی دی ڤانس، جێگری سەرۆكی ئەمریكا لەگەڵ تاران تەنیا بۆ كەرەستەی پزیشكی بووە، هەرچەندە میدیا ئەمریكییەكان بە هەوڵێك بۆ دەستپێكردنەوەی گفتوگۆی ئاشتیی نێوان واشنتن و تارانی دادەنێن.