22 خولەک پێش ئێستا
68 جار خوێنراوەتەوە
دیالە.. بە تەقەی پۆلیس سێ منداڵ گیانیانلەدەستدا و پێنجی دیكە بریندار بوون
پەیام
لە پارێزگای دیالە، لە
كاتی دەستگیركردنی داواكراوێكدا بە گولـلەی پۆلیس سێ منداڵ گیانیان لەدەست دا و پێنجی
دیكە بریندار بوون، لەسەر بڕیاری وەزیری ناوخۆی عێراقیش لیژنەیەكی لێكۆڵینەوە پێكهێنرا
و ئەفسەرێك و 10 كارمەند دەستبەسەر كران.
فەریق سەعد مەعن، سەرۆكی
شانەی ڕاگەیاندنی ئەمنی، لە ڕاگەیەندراوێكدا ئاشكرای كرد، ئەنجومەنی لێكۆڵینەوەكە
بە سەرپەرشتیی ئەفسەرانی پلەباڵا پێكهێنراوە بۆ بەدواداچوونی وردەكاریی ڕووداوەكە،
كە لە كاتی جێبەجێكردنی ئەركی دەستگیركردنی كەسێكی داواكراو بەپێی ماددەی 406، لە
ناحیەی داروسەلام لە ناوچەی «ڕەكەی حاجی سوهەیل» لە پارێزگای دیالە ڕوویداوە.
ناوبراو ڕوونی كردووەتەوە،
داواكراوەكە لەناو ئۆتۆمبێلەكەیدا بووە، پابەندی فەرمانی بازگەی پشكنین نەبووە و هەڵاتووە،
ئەمەش وایكردووە هێزە ئەمنییەكەی سەر بە وەزارەتی ناوخۆ تەقە بكات و ببێتە هۆی
كوژران و برینداربوونی ئەو منداڵانە، كە ئێستا منداڵە بریندارەكان بۆ وەرگرتنی چارەسەر
لە نەخۆشخانە خەوێندراون.
هەروەها ئاماژەی بەوە
داوە كە هێزە ئەمنییەكە توانیویەتی داواكراوەكە دەستگیر بكات، لە بەرامبەردا وەك ڕێكارێكی
سەرەتایی تاوەكو یەكلاییبوونەوەی ئەنجامی لێكۆڵینەوەكان، بڕیاری دەستبەسەركردنی ئەفسەرێك
و 10 كارمەندی ئەو هێزە دراوە و ڕێكارە یاسایی و لێكۆڵینەوە پێویستەكان بەرامبەریان
دەگیرێنەبەر.
لە تۆڕە کۆمەڵایەتیەکان شەیری بکە