وادەی ناردنی مووچەی مانگی سێ دیار نییە و شاندێكی هەرێم لە بەغدادە

پەیام

تا ئێستا وادەی ناردنی مووچەی مانگی سێی هەرێمی كوردستان دیار نییە، شاندێكی هەرێمیش بۆ دۆسیەی گومرگ، لە بەغدادە.
 
بۆ یەكلاكردنەوەی كێشەی دەروازە سنوورییەكان و ڕێكخستنەوەی باج، شاندێكی حكومەتی ماوەبەسەرچووی هەرێمی كوردستان گەیشتە بەغدا و بڕیارە لەگەڵ بەرپرسانی حكومەتی فیدراڵدا پرسی جێبەجێكردنی سیستەمی "ئەسیكۆدا" تاوتوێ بكەن. 
 
بە ئاژانسی "بەغداد ئەلیەوم" بڵاوی كردووەتەوە، ئامانجی سەرەكیی سەردانەكەی شاندەكەی هەولێر، كۆبوونەوەیە لەگەڵ لایەنە پەیوەندیدارەكانی بەغدا بۆ گەیشتن بە لێكتێگەیشتنی كۆتایی لەسەر چۆنیەتیی كاركردنی ئەو سیستمە ئەلیكترۆنییە نوێیەی گومرگ. 

تەوەری سەرەكیی گفتوگۆكان تەرخان دەكرێت بۆ میكانیزمی جێبەجێكردنی ئەو سیستەمە، كە تایبەتە بە بەڕێوەبردن و ڕێكخستنی دەروازە سنوورییەكان و پرۆسە گومرگییەكانی نێوان هەرێم و بەغدا.

ڕۆشتنی شاندەكەی هەرێم لەكاتێكدایە، مووچەی فەرمانبەر و خانەنشیان لە عێراق دابەش كراوە، بەڵام تا ئێستا دیار نییە مووچەی مانگی سێی مووچەخۆرانی هەرێمی كوردستان كەی دەنێردرێت.