سەرۆكوەزیرانی عێراق دەستكەوتی 100 ڕۆژی تەمەنی حكومەتەكەی ڕاگەیاند

پەیام

سەرۆكوەزیرانی عێراق دەستكەوتی 100 ڕۆژی تەمەنی حكومەتەكەی لە بوارەكانی ئابووری و ئەمنی ڕاگەیاند.

نووسینگەی میدیایی عەلی فالح زەیدی، سەرۆك وەزیرانی عێراق، لە ڕاپۆرتێكدا ئاماری 100 ڕۆژی یەكەمی كارەكانی كابینە حكومییەكەی بڵاو كردەوە و ئاماژەی بەوە كردووە كە لە دۆسیەی دژە گەندەڵیدا، توانراوە 160 ملیۆن دۆلار و 380 ملیار دینار لەگەڵ 402 كیلۆگرام زێڕ بۆ خەزێنەی دەوڵەت بگەڕێنرێتەوە. 

هەروەها ئەوە خراوەتە ڕوو كە لە كەرتی كۆمەڵایەتیدا، پڕۆژەی دابەشكردنی یەك ملیۆن پارچە زەوی ڕاگەیەندراوە كە ئاوارە ئێزدییەكانیش دەگرێتەوە. 

سەبارەت بە سەروەری وڵات، زەیدی جەختی لە دانانی كاتێكی دیاریكراو بۆ كشانەوەی هێزە بیانییەكان و قەدەغەكردنی چەك لە دەرەوەی دەوڵەت كردەوە. 

لە كەرتی وزەدا، حكومەت پلانی كڕینی 37 هەزار مێگاوات كارەبای لە كۆمپانیای GE و وزەی خۆر داڕشتووە، بە ئامانجی ئەوەی ساڵی 2027 بەرهەمهێنانی كارەبا دوو هێندە بكرێت. 

هەروەها ڕێككەوتنی بۆری نەوت لەگەڵ سووریا و واژۆكردنی گرێبەستە گەورەكان لەگەڵ ئەمریكا وەك هەنگاوی ستراتیژی بۆ ڕووبەڕووبوونەوەی قەیرانی گەرووی هورمز و پەرەپێدانی ئابووری ناسێندراون.