لەیادی لە دایکبونی پێغه‌مبەر (درودی خودای لەسەر بێت)

عه‌لی حه‌مه‌ ساڵح

ھاتنی موحەمەد (درودی خودای لەسەر بێت)، ڕەحمەتێکی خودا بوە بۆ دادپەروەری و یەکتاپەرستی و ڕوبەڕوبونەوەی زوڵم و ستەمکاری.

ئێستاش لەیادی لەدایکبونی پێغەمبەردا (درودی خودای لەسەر بێت) ھەندێک بەکاریکاتێر بێڕێزی بە پێغەمبەر دەکەن و ھەندێکیش (لەوانە تورکیا) ئەم دۆسیە بۆ سیاسەت بەکاردەھێنن، کە خۆیان تاوانی زۆر گەورەتر بەرامبەر مرۆڤایەتی و موسوڵمانان ئەنجام دەدەن.

بەندە یەکێکم لەو ٢٥ پەرلەمانتارەی واژۆمکردوە لەسەر نیگەرانی ئەو کاریکاتێرانەی بەرامبەر پێغمبەر کراوە، بە زمانێکی دیبلۆماسی نوسراوە، زۆرترین بەشی یاداشتەکەش باسی ڕۆڵی گەورەی فەڕەنسا دەکات لە پشتیوانی گەلی کورد، لەبەشێکی دیکەدا و لە تەنیشی پێکەوە ژیان لەم وڵاتە نوسراوە( نیگەرانین بەو ڕەفتارەی بەرامبەر پێغمبەر ( درودی خودای لەسەر بێت) کراوەو باوەڕمان بە پێکەوە ژیانی ئاشتیانە ھەیە!

ئایا بەو پەڕی ڕێزەوە بڵێیت: نیگەرانین لەوەی بێڕێزی بەرامبەر پێغمبەرمان کراوە! تاوانە؟

زۆرینەی خەڵکی کوردستان موسوڵمانن، ھیچ حیزب و سەرکردەیەک بە ساڵێکیش ١٠٪‏ ئەو ھاوڵاتیانەی بۆ کۆنابێتەوە، کە ڕۆژانی ھەینی ڕودەکەنە مزگەوتەکان، ئایا ئەوانە نیگەراننین بەوەی پێغەمبەرکەیان بکرێتە کاریکاتێر؟.

بۆ زانین بەپێی بڕیاری دادگای ئەوروپی بۆ مافەکانی مرۆڤ لە ساڵی ٢٠١٨ : بێڕێزی بەرامبەر پێغمبەر ( درودی خودای لەسەر بێت ) ناچێتە چوارچێوەی ئازادی ڕادەربڕین.. ئێمەش ھەر وامان وتوە.

ئەمە چ دکتاتۆریەتێکە!! منێک ئەگەر بڵێم نیگەرانم بەوەی پێغمبەرەکەم کراوە بەکاریکاتێر، نوێنەرایەتی خەڵکی کوردستان نەکەم! بەڵام یەکێک پشتیوانی ھەموو کارێکی ڕەواو ناڕەوا بکات لە فەڕەنساوە بکرێت( بەکاریکاتێرەکانیشەوە) نوێنەرایەتی خەڵک دەکات!
ھەندێک کەس دەیانەوێت، ئەم نیگەرانییە بگۆڕن بەوەی گوایە پشتیوانی سیاسەتی ئەردۆگانە!.

ئەوەندەی پەیوەندی بەخۆم ھەیە، ئەم خوێندنەوە بە ناڕەوا دەزانم: ئەو تاوانەی تورکیاو ھەندێک وڵات کردویانە بەرامبەر ئیسلام، بێ وێنەن!.

کاتێک حاکمێک لەژێر بەرگی دین خەریکی کوشتن و زیندانی موسوڵمانانیی بێتاوانە! لەژێر بەرگی دین موسوڵمان زیندانی دەکات و دەیکوژێت و شەرعیەت بکردنەوەی ھەزاران ناوەندی لەشفرۆشی دەدات! تاوانەکەی زۆر گەورەتری کردوە!.

ئەوە ئێمە بوین لە پەرلەمانی کوردستاندا باسی تاوانی ئەردۆغانمان کرد بەرامبەر گەلی کورد و کوشتنی سەدان کەس بە ناھەق.

ئەوە ئێمەبوین وەلامی کونسوڵی تورکیاماندایەوە کە ئەزمونی ڕۆژئاوای بەتیرۆر ناوبرد!! "لینکی قسەکان لە کۆتایی ئەم وتارەیە"!

بەڵێ، ئەوە ئەردۆگانە ھەزاران موسوڵمانی سەربە فەتحویلا گویلەنی لەسەر کاری ڕێکخراوی و بیری سیاسی زیندانی کردوە، ھەزاران کوردی بەناحەق خستوتە زیندان!! ئەوە ڕژێمی تورکیابوو بە ناحەق سەدان کوردی موسوڵمانی شەھیدکرد.

پێغەمبەر (درودی خودای لەسەر بێت) دەڵێ: من لا يشكر الناس لا يشكر الله.

بەڵێ، ئەوە دەوڵەتانی ئەورپابون دەرگایان بۆ ملیۆنان موسوڵمانی لێقەوماو کردەوە، پێویستی ژیان و دەرفەتی خوێندنیان بۆ خولقاندن، ڕێگایاندا مزگەوت بکەنەوەو بانگھێشتی ناموسڵمانەکانیش بکەن بۆ سەر ئاینی ئیسلام، بەڵام وڵاتانی خەلیج دەرگایان تەنیا بۆ سەرمایەداران کراوەیە!

بەڵی توندو تیژی و کوشتن و سەربڕین لە ئەورپاو ھەر شوێنێکی دونیا تاوانەو خزمەت بە ئیسلام ناکات، ئیسلام لە ڕێگەی نمونەی جوانی پێکەوەژیان و ڕەفتاری بەرزەوە گەشە دەکات و ئەروپاش ئەو دەرگایە کە ئیسلام لەڕێگایەوە گەشە دەکات..

ئەم ڕەفتارانەی ئەورپا یەکسان نیە بەوەی ئەگەر بێڕێزیەک بەرامبەر پێغمبەرەکەم کرا، نەتوانم نیگەرانی دەرببڕم.

بەڵێ من دوو جار کە خۆم ھەڵبژاردوەو دەنگی ساختەکاریم نەھێناوە وەک خەڵکی دیکە، ئیمان و باوڕیشم بۆ دەنگدران ئاشکرابوەو جارێک ١٤٠ ھەزارو جارێک ٩٣ ھەزار دەنگم ھێناوە، ئێستاش نوێنەرایەتی ئەو خەڵکە دەکەم کە نیگەرانن بەوەی پێغمبەر بکرێتە کاریکاتێر! ئاسایە خەڵکی دیکەش بڵێت: نوێنەرایەتی ئەو خەڵکە دەکەم کە کاریکاتێری پیغمبەر لایان کارێکی ئاساییە.