ئەفریقیا.. لە هەفتەیەكدا 107 حاڵەتی گیانلەدەستدان بەهۆی ئاوڵەی مەیموونەوە تۆماركراون

پەیام

لەماوەی یەك هەفتەی ڕابردودا زیاتر لە 100 حاڵەتی گیانلەدەستدان  بەهۆی ئاوڵەی مەیموونەوە لە كیشوەری ئەفریقیا تۆمار كراون.

لە ڕاگەیەنراوێكدا ناوەندی ئەفریقی بۆ بەرەنگاربوونەوەی نەخۆشییەكان و خۆپارێزی بڵاوی كردەوە، ئاماری گیانلەدەستدانەكان بەهۆی تووشبوون بە ئاوڵەی مەیموون بە شێوەیەكی نیگەرانكەر بەرز بوونەتەوە و تەنیا لە هەفتەی ڕابردوودا زیاتر لە 100 حاڵەتی گیانلەدەستدان لە وڵاتە ئەفریقییەكاندا تۆمار كراون.

لەوبارەیەوە جان كاسیا، بەڕێوەبەری گشتیی ناوەندەكە ڕایگەیاندووە، 107 حەڵەتی گیانلەدەستدان و سێ هەزار و 160 حاڵەتی تووشبوون لە ماوەی هەفتەی ڕابردوودا تۆمار كراون، ئەوەش تەنیا هەفتەیەك دوای ڕاگەیاندنی پلانی ڕووبەڕووبونەوەی كیشوەری دێت لەلایەن ناوەندەكەیان و ڕێكخراوی تەندروستی جیهانی.

ناوبراو وتیشی: لە پشكنینەكاندا دەركەوتووە پیاوان بەڕێژەی 63 لەسەد بەرزترین ڕێژەی تووشبوونیان بە ئاوڵەی مەیموون تۆمار كردووە و 41 لەسەدیش لە نێو منداڵانی خوار تەمەن 15 ساڵاندا بووە.

هەروەها ئاماژەی بەوەش كرد دەكرێت نەخۆشیەكە لە دایكەوە بۆ كۆرپەكەی بگوازرێتەوە لە ماوەی دووگیانیدا.

ئەمە لەكاتێكدایە كە لە مانگی ڕابردوودا چەند حاڵەتێكی تووشبوون و گیانلەدەستدا بە نەخۆشیی ئاوڵەی مەیوون لە 12 وڵاتی ئەفریقیا تۆمار كرا و هۆشداری لە مەترسیداری بڵاوبوونەوەی زیاتر درا، لە سەرەتای ئەمساڵیەوە تاكو ئیستا پێنج هەزار و 731 حاڵەتی گیانلەدەستدان بەهۆی نەخۆشییەكەوە تۆمار كراوە.