پیشەسازیی داودەرمانی جیهان لە 10 ساڵی داهاتوودا بۆ دوو هێندە زیاد دەكات

پەیام

پێشبینی دەكرێت پیشەسازیی داودەرمان لە 10 ساڵی داهاتوودا بۆ دوو هێندە زیاد ببێت.

بەپێی ماڵپەڕی گڵۆب نیوز وایر، پیشەسازیی بەرهەمهێنانی دەرمان لە جیهاندا بۆ ئەمساڵ نزیكەی 185 ملیار دۆلار بووە، هەروەها پێشبینی دەكرێت لە ساڵی 2033، واتە بۆ 10 ساڵی داهاتوو ئەم ژمارەیە 345 ملیار دۆلار تێبپەڕێنێت كە دوو هێندەی قەبارەی ئێستای پیشەسازیی دەرمانە.

هەروەها بەپێی ماڵپەڕی سینزا، لە ناوچەی رۆژهەڵاتی ناوەڕاست و باكووری ئەفریقا، بازاڕی داودەرمان گەشەندنێكی زۆری بەخۆوە بینیوە، ئەمەش بەهۆی بەرەوپێشچوونی ئابوریی و كۆمەڵایەتیی و باشبوونی ژێرخانی چاودێریی تەندروستی، بەو هۆكارە چاوەڕوان دەكرێت لە ساڵی 2025 ـدا بەهای بازاڕی دەرمان بگاتە 60 ملیار دۆلار، هەروەها بە ڕێژەی لەسەدا 6 پۆینت 8 گەشە بكات.

لەسەر ئاستی عەرەبییش كەرتی پیشەسازیی دەرمان لە (سعودیە، ئیماڕات، جەزائیر، تونس، مەغریب، ئوردون و میسر) بەرەوپێشچوونی بەرچاوی بەخۆوە دیوە.

هەفتەی ڕابردووش، كۆنگرەی چین بۆ پیشەسازیی دەرمان ڕایگەیاند: لە سێ ساڵی ڕابردوودا دەسەڵاتدارانی پەكین ڕێگەیان بە بەرهەمهێنان 113 دەرمانی نوێ داوە و قەبارەی بازرگانیی دەرمان لە چین نزیكەی 14 ملیار دۆلاری ئەمریكییە.