16/12/2024
172 جار خوێنراوەتەوە
بەهۆی بەفرەوە لە 26 پارێزگای ئێران و ڕۆژهەڵاتی كوردستان پشووی فەرمییە
پەیام
بەهۆی بەفر و سەرما و سۆڵەوە لە 26 پارێزگای ئێران ورۆژهەڵاتی كوردستان دەوامی خوێندن ڕاگیرا و دەرگای خوێندنگەكان داخران.
چەند رۆژێكە شەپۆلێكی بەفر و سەرمای توند ئێران و رۆژهەڵاتی كوردستانی گرتووەتەوە، بەو هۆیەشەوە خواست و پێویستی لەسەر بەكارهێنانی غازی ماڵان بەرێژەیەكی بەرچاو بەرز بووەتەوە، ئەمەش وای كردووە كێشە و مەترسیی كەمبوونەوەی غاز دروست ببێت. وەزارەتی پەروەردەی ئێران ڕایگەیاندووە، بە مەبەستی كەمكردنەوەی فشار لەسەر تۆڕی نیشتیمانیی غازدا، دەوامی خوێندن لە 26 پارێزگای ئێران ڕاگیراوە.
داخستنی دەرگای قوتابخانەكان زۆرینەی ناوچەكانی رۆژهەڵاـی كوردستانیشی گرتووەتەوە، وەك ئیلام و كرماشان و سنە و ورمێ.
هەروەها ئەمیر عەباس جەعفەری، بەرێوەبەری گشتیی بەرێوەبردنی قەیرانەكان لە پارێزگای ورمێ ڕایگەیاندووە، ئەمرۆ لە تەواوی قوتابخانەی حكومی و تایبەت و فەرمانگە حكومیەكان پشووی فەرمییە. داواشی كردووە خەڵكی ناوچەكە غاز و كارەبای كەمتر بەكاربهێنن.
لە تۆڕە کۆمەڵایەتیەکان شەیری بکە