ئینتەرمیلان پەیامێک ئاڕاستەی بەرشەلۆنە دەکات

پەیام سپۆڕت - مەڕوان تالیب

پیرۆ ئۆسیلیۆی بەڕیوەبەری وەرزشی یانەی ئینتەرمیلان پەیامێک ئاڕاستەی بەرشەلۆنە دەکات و ڕایگەیاند، ئالیساندرۆ باستۆنی گرێبەست ماوە.

 ڕۆژنامەی سپۆرت ئاماژەی بەوە کردووە، ئینتەر نیگەرانە لە دۆخی باستۆنی، چونکە ئاگادارن بریکارەکانی یاریزانەکە ڕاستەوخۆ پەیوەندییان بە بەرشەلۆنەوە کردووە، بەڵام تا ئێستا هیچ پێشکەوتنێک لە گفتوگۆکاندا ڕووی نەداوە، سەرەڕای ئەوەی باس لە ڕێککەوتنی تاکەکەسی نێوان بەرگریکارەکە و یانە کەتەلۆنییەکەش دەکرێت.

بەڵام پیرۆ ئۆسیلیۆ، بەڕێوەبەری وەرزشی یانەی ئینتەر میلان، جەختی کردەوە لەوەی باستۆنی گرێبەستی لەگەڵ یانە ئیتاڵییەکە هەیە و هیچ ئاماژەیەک نییە بۆ ڕۆیشتنی لە ماوەی داهاتوودا.

ئۆسیلیۆ دەشڵێت: نازانم لە ئیسپانیا چی دەوترێت، بەڵام ئێمە دڵخۆشین بەوەی باستۆنی پێشکەشی ئینتەری کردووە و دڵنیاشین زیاترمان پێشکەش دەکات، ئەگەر هەر یانەیەک ئارەزووی لە باستۆنییە، ژمارەی تەلەفۆنەکەیان لایە و پێویستە پەیوەندی پێوە بکەن لەجیاتی ئەوەی تەنیا قسە بکەن.