مۆرینیۆ لە بارەی گەڕانەوەی بۆ ڕاهێنەرایەتی ڕیاڵ مەدرید قسەی خۆی کرد

پەیام سپۆڕت - مەڕوان تاڵیب

جۆزێ مۆرینیۆ لە بارەی دەنگۆکانی گەڕانەوەی بۆ ڕاهێنەرایەتی ڕیاڵ مەدرید قسەی خۆی کرد.

 لە چەند ڕۆژی ڕابردوو وابڵاوکرایەوە خوودی پێرێزی سەرۆکی ڕیاڵ گفتوگۆی ڕاستەوخۆی سەبارەت بە گەڕانەوەی مۆرینیۆ ئەنجامداوە و ڕاهێنەرە پۆرتوگالییەکە ئامادەیە ئەرکەکە وەربگرێت.

لەو بارەیەوە "سپێشەڵ وەن" هاتە دەنگ و ئاشکرای کرد، ئامانجی داهاتووی ئەوەیە بەنفیکا بۆ چامپیۆنسلیگی وەرزی داهاتوو سەربخات، چونکە ئەگەر لە سێ یاری داهاتوو براوە بن، ئەوا لە گەورەترین ڕکابەری ئەورووپا یاریی دەکەن و ئەوە تاکە شتێکە لە ئێستادا بیری لێدەکاتەوە و بیر لە هیچ شتێکی دیکەش ناکاتەوە.

لە بەشێکی دیکەی قسەکانی ڕاهێنەرەکەی بەنفیکا ئاماژەی بەوەکرد، ئەمڕۆ زۆر کەس لەسەر کورسی ڕاهێنەرایەتی دانیشتوون تەنیا لەبەر ئەوەی دەتوانن بە باشی بازاڕگەری بۆ خۆیان بکەن.

لە کۆتایدا سەبارەت بە ئەزموونی لەگەڵ یانەی ڕۆما، مۆرینیۆ وتی: ئەوێ تایبەتترین شوێن بوو لە ماوەی کارکردنم، کەشوهەوای یاریگای ئۆڵۆمپیکۆ و دڵسۆزیی هاندەران شتێکی تەواو جیاواز بوو، ئاهەنگەکانی بردنەوەی نازناوی کۆنفرانسلیگ، تەنانەت لە نازناوەکانی خولی یانە  پاڵەوانەکانیشم درەوشاوەتر و گەورەتر بوون.