سەرۆکی ناپۆلی دیدگایەکی نوێ بۆ یاساکانی تۆپی پێ دەخاتەڕوو

پەیام سپۆڕت - مەڕوان تاڵیب

ئۆریلیۆ دی لۆرێنتێسی سەرۆکی ناپۆلی دیدگایەکی نوێ و مشتومڕاوی سەبارەت بە پەرەپێدانی یاساکانی تۆپی پێ خستە ڕوو.

 لەمیانەی نوێترین چاوپێکەوتنی ڕۆژنامەوانیدا، سەرۆکی ناپۆلی پێیوایە کۆنتی ڕاهێنەر هەرگیز دەستبەرداری تیپەکە نابێت و بڕوای وایە بەردەم دەبێت.

لە بەشێکی دیکەی قسەکانی دی لۆرێنتێس پێشنیاز دەکات، کاتی یارییەکان کەم بکرێتەوە، بە شێوەیەک هەر 45 خولەکێک بکرێت بە 25 خولەک لەگەڵ هەژمارکردنی کاتی ڕاستەقینەی یاریکردن تەنیا کاتێک کە تۆپ لە یاریگادا دەبێت، ئەمەش لەبری کاتی زیادکراو لە کۆتایی هەر نیوەیەک.

هەروەها سەرۆکی ناپۆلی داوای هەڵوەشاندنەوەی شێوازی کارتی زەرد و سووری کرد بە گۆڕینی بۆ سزای کاتی، بەجۆرێک یاریزان لە بری کارتی زەرد بۆ ماوەی پێنج خولەک دەربکرێت و لە بری کارتی سووریش بۆ ماوەی 20 خولەک دەربکرێت.

لە کۆتایدا ئۆریلیۆ دی لۆرێنتێس دەڵێت: گۆڵەکان زۆر کەمن بەو شێوەیە هیچ چێژێکی بنینی نامێنێت و پێویستە گۆڵی زیاتر تۆمار بکرێت، بۆ ئەوەش پێویستە یاساکان بگۆڕدرێن، بۆ نموونە نابێت گۆڵێک تەنیا بەهۆی چەند ملیمەترێکەوە ڕەتبکرێتەوە و پێویستە یاسای ئۆفساید بگۆڕدرێت.