فلیک لەبەر چەند تایبەتمەندییەک داوای گواستنەوەی پیریسیچی کردووە

پەیام سپۆڕت - مەڕوان تاڵیب

هانسی فلیکی ڕاهێنەری یانەی بەرشەلۆنە لەبەر چەند تایبەتمەندییەک داوای گواستنەوەی ئیڤان پیریسیچی کڕواتی کردووە.

 ڕۆژنامەی سپۆڕت ئاشکرای کردووە، فلیک پلانی داناوە بۆ وەرزی داهاتوو پیریسچ پەلکێشی تیپەکەی بکات بە گواستنەوەیەکی بێبەرانبەر ئەوەش بۆ چەند خاڵێک دەگەڕێتەوە.

یەکەم لەوانە ئەوەیە وەرزی 2019 بۆ 2020 هەردووکیان لە بایرن میونخ پێکەوە کاریان کردووە، جگە لەوەش ئیڤان کەسایەتییەکی بەهێزی هەیە و سیفەتی سەرکردەبوونی تیایە و لە ژووری جلگۆڕین یاریزانێکی گرنگ بووە.

هۆکارێکی دیکە کە فلیک هەوڵی هێنانی پیریسیچ دەدات، ئەوەیە هاوسەنگی زیاتر لە نێوان یاریزانە لاوەکان و بە ئەزموونەکان دروست بکات و تاکو ئێستاش لە تەمەنی 36 ساڵی ئاستی خۆی پاراستووە و وەرزی ڕابردوو لەگەڵ ئایندهۆڤن نازناوی خولی هۆڵەندی بردەوە.

لە کۆتایدا سپۆڕت ڕوونی دەکاتەوە، ئیڤان پیریسیچ دوو خاڵی گرنگی هەیە کە بەرشەلۆنە دەتوانێت سوودی لێوەربگرێت، بە تایبەتی یاریزانەکە لە ئۆڤەرکردن تایبەمەندی خۆی هەیە و جگە لەوەش لە ڕووی ئاڕاستەکردنی تۆپەوە لە دەرەوەی ناوچەی سزاوە بۆ گۆڵی تیپی بەرانبەر توانایەکی زۆر باشی لەو ڕووەوە هەیە، ئەمەش وایکردووە فلیک هەوڵی هێنانی بدات.

ڕۆژنامەی موندۆش بڵاوی کردووەتەوە، لە ئێستادا ئایندهۆڤن گرێبەستێکی نوێیان بۆ ماوەی دوو وەرزی دیکە پێشکەش بە پیریسیچ کردووە، بەو پێیەی وەرزی ڕابردوو لە 35 ئارئدا 16 گۆڵ و 11 ئاسیستی تۆمار کرد.