ئەمریكا نیازى دەستپێکردنەوەى دانوستانەکانى لەگەڵ ئێران هەیە

پەیام 

میدیای ئەمریكا ئاشكرای دەكات، ئیدارەی ترەمپ هەوڵ دەدات هەفتەی داهاتوو كۆبوونەوەی نێوان واشنتۆن و تاران بەڕێوە بچێت و دانوستان دەست پێ بكاتەوە.

ماڵپەڕی ئەكسیۆس بڵاوی كردووەتەوە، ستیڤن ویتكۆف، نوێنەری ئەمریكا بۆ ڕۆژهەڵاتی ناوەڕاست پلان بۆ ئەوە دادەنێت هەفتەی داهاتوو لەگەڵ عەباس عەراقچی، وەزیری دەرەوەی ئێران لە ئۆسلۆی پایتەختی نەرویج كۆببێتەوە.

ماڵپەڕەكە ئاماژەی بەوە داوە، ئەم كۆبوونەوەیە وەك هەوڵێكی ئەمریكا لێك دەدرێتەوە بۆ دەستپێكردنەوەی دانوستانەكانی نێوان واشنتۆن و تاران لەبارەی دۆسیەی ئەتۆمییەوە.

ئەكسیۆس هەروەها نووسیویەتی، عەممان و قەتەر وەك نێوەندگیر بەردەوامن لە هەوڵدان بۆ ئەوەی هەردوو لایەنی ئەمریكا و ئێران بۆسەر مێزی گفتوگۆ ڕازی بكەن.

هەوڵی ئەمریكا بۆ دەستپێكردنەوەی گفتوگۆ لەگەڵ ئێران لەبارەی بەرنامە ئەتۆمییەكەیەوە لەكاتێكدایە مانگی ڕابردوو ئەمریكا هێرشی كردە سەر چەند دامەزراوەیەكی ئەتۆمیی ئێران، هەروەها دۆناڵد ترەمپ، سەرۆكی ئەمریكا ڕایگەیاندبوو بەرنامەی ئەتۆمیی ئێرانیان لەناو بردووە و پێویست بە گفتوگۆ ناكات.