27/09/2025
305 جار خوێنراوەتەوە
سودانی بۆ بەرپرسانى هەرێم: لە ڕادەستكردنی نەوت و داهاتەكەی سوپاستان دەكەم
پەیام
سەرۆكوەزیرانی عێراق ژمارەیەك پەیوەندی تەلەفونی لەگەڵ بەرپرسانی هەرێمی كوردستان ئەنجام دا و لە گەیشتن بە ڕێككەوتنی دەستپێكردنەوەی هەناردەی نەوتی هەرێمی كوردستان و گەڕانەوەی داهاتەكەی بۆ گەنجینەی ناوەندی سوپاسی كردن.
بەپێی ڕاگەیەنراوێكی نووسینگەی ڕاگەیاندنی، محەممەد شیاع سودانی سەرۆكوەزیرانی عێراق لەگەڵ هەر یەك لە سەرۆكی هەرێمی كوردستان، سەرۆكوەزیرانی ماوەبەسەرچووی هەرێم و سەرۆكی پارتی و یەكێتی پەیوەندیی تەلەفونیی ئەنجام داوە.
بەپێی ڕاگەیەنراوەكەی نووسینگەكەی، سودانی لەو پەیوەندییە تەلەفونییانەدا سوپاسی ئەو بەرپرسانەی هەرێمی كوردستانی كردووە كە لە گەیشتن بە ڕێككەوتنی دەستپێكردنەوەی هەناردەی نەوتی هەرێمی كوردستان، گەڕانەوەی داهاتەكەی بۆ گەنجینەی ناوەندی، هەروەها لایەنگیریی لە بەرژوەندییەكانی گەل لە هەر ناوچەیەكی عێراق، بەشدار بوون.
پێشتریش ماڵپەڕی حكومەتی ماوەبەسەرچووی هەرێمی كوردستان بڵاوی كردەوە، كە لە پەیوەندییەكی تەلەفونییدا، سەرۆكوەزیرانی هەرێمی كوردستان هیوای خواست ئەم ڕێككەوتنە ببێتە ڕێخۆشكەر بۆ دەرچوونی یاسای نەوت و غاز.
سەرۆكایەتی هەرێمی كوردستانیش ڕایگەیاند: لە پەیوەندییەكی تەلەفونیدا لەگەڵ سەرۆكوەزیرانی فیدڕاڵ، سەرۆكی هەرێمی كوردستان ڕایگەیاند: ڕێككەوتنەكە ئاسۆی نوێ لەبەردەم هاریكاریی هاوبەشی نێوان هەولێر ـ بەغداد دەكاتەوە.
لە تۆڕە کۆمەڵایەتیەکان شەیری بکە