ئەمریكا چوار بزوتنەوەی ئەوروپی خستە لیستی تیرۆرەوە

پەیام 

لە هەنگاوێكی نوێدا و لە چوارچێوەی هەڵمەتەكانی دۆناڵد تڕەمپ سەرۆكی ئەمریكادا، لە دژی بزوتنەوەی "ئەنتیڤا"، ویلایەتە یەكگرتووەكانی ئەمریكا چوار بزووتنەوەی وەك ڕێكخراوی تیرۆریستی بیانی دەستنیشان كرد، كە خۆیان وەك دژە فاشیزم لە ئەڵمانیا و ئیتاڵیا و یۆنان ناوزەد دەكەن. 

ماركۆ ڕوبیۆ، وەزیری دەرەوەی ئەمریكا، ڕایگەیاند: ئەم پۆلێنكردنە، كە لە 20ی تشرینی دووەمەوە دەچێتە بواری جێبەجێكردنەوە، بزووتنەوەی "ئەنتیڤا ئۆست" لە ئەڵمانیا و سێ گرووپی دیكە لەخۆ دەگرێت، كە یەكێتیی نافەرمیی ئەناركیستی/بەرەی شۆڕشگێڕی نێودەوڵەتی لە ئیتاڵیا، دادپەروەریی پرۆلیتاریای چەكدار، و بەرگریی لەخۆكردنی چینی شۆڕشگێڕە لە یۆنان.
بەپێی ڕاگەیەندراوەكە، "ئەنتیفا ئۆست" لەنێوان ساڵانی 2018 و 2023دا ژمارەیەك هێرشی ئەنجامداوە دژی ئەو كەسانەی كە بە فاشیست دانراون، هەروەها ژمارەیەك ئۆپەراسیۆنی لە هەنگاریا لە ساڵی 2023دا ئەنجام داوە. هاوكات ئەو كەسانەی پۆلێن كراون چوونە نێو ویلایەتە یەكگرتووەكانیان لێ‌ قەدەغە دەكرێت و سەرجەم سەروەت و سامانەكانیان بلۆك دەكرێت و هەموو جۆرە پشتیوانیەكی ماددیان قەدەغە دەكرێت. 

"ئەنتیڤا" بزووتنەوەیەكی پەرشوبڵاو و چەپڕەوی توندڕەوە كە لە دوای هەڵبژاردنی ترەمپ لە ساڵی 2016دا دەركەوت. ڕاستڕەوەكان بە تێوەگلان لە توندوتیژی لە كاتی خۆپیشاندانەكاندا تۆمەتباری دەكەن، و واشنتۆنیش بە خاوەن ئایدیۆلۆژیایەكی "ئەناركیستی یان ماركسیی شۆڕشگێڕی"ی دادەنێت كە بۆ هاندانی هێرشەكان بەكاردەهێنرێت.