كەشناسیی عێراق: لە ئێوارەی ئەمڕۆوە پێشبینی بارانی بەخوڕ و لافاو دەكرێت

پەیام 

دەستەی كەشناسیی عێراق پێشبینی دەكات لە ئێوارەی ئەمڕۆ تا كۆتایی هەفتە شەپۆلێكی بارانی بەخوڕ و لافاو ڕوو لە عێراق و هەرێمی كوردستان بكات.

دەستەكە لە ڕاگەیەنراوێكدا ئاماژەی بەوە كردووە "هۆكاری ئەم شەپۆلە بۆ قوڵبوونەوەی كەشێكی ساردی چینە بەرزەكانی هەوا لە ئەوروپاوە بەرەو باكووری ئەفریقا، هەروەها سوڕانەوەی تەوژمە ساردەكان لە باكووری دەریای سوور كە دەبێتە هۆی چالاكبوونی نزمە پەستانی دەریای سوور، دەگەڕێتەوە.

ئەوەشی خستووەتە ڕوو "شەپۆلەكە لە ئێوارەی ئەمڕۆوە دەستپێدەكات و سەرەتا كاریگەری لەسەر ناوچەكانی ڕۆژئاوای وڵات دەبێت، دواتر ناوچەكانی دیكەش دەگرێتەوە و بۆ ماوەی چەند ڕۆژێك بە پچڕپچڕ بەردەوام دەبێت". 

دەستەی كەشناسیی عێراق روونیشی كردەوە "پێشبینییەكان ئاماژە بە بارانی بەخوڕ بۆ زۆر بەخوڕ دەكەن لە ناوچەكانی باكووری عێراق، لەگەڵ ئەگەری زۆری دروستبوونی لافاو لە دۆڵ و ناوچە نزمەكاندا بەهۆی ئەوەی بڕی بارانبارینەكە لە ڕێژەی ئاسایی تێدەپەڕێت".

دەستەی كەشناسی عێراق باسی لەوەش كردووە "بارانبارینەكە بەشێوەی تاوەباران لەگەڵ هەبوونی هەورەبروسكە دەبێت، هەروەها هەندێك جار شێوەی (بارانی بەردەوام) وەردەگرێت".

هاوكات هۆشداری دا لە بارانی بەخوڕ كە بروسكە و هەورەتریشقەی لەگەڵدایە، داواش لە هاووڵاتیان دەكات لە ڕێڕەوی لافاو و دۆڵ و ناوچە نزمەكان دوور بكەونەوە، هەر وەك جەختیش لەسەر بەكارنەهێنانی مۆبایل لەكاتی هەورەتریشقەدا دەكاتەوە.