هۆکاری ڕۆیشتن یاخوود دوورخستنەوەی مارێسکا ئاشکرا دەبێت

پەیام سپۆڕت - مەڕوان تاڵیب

هۆکاری ڕۆیشتنی ئینزۆ مارێسکای ئیتاڵی لە ڕاهێنەرایەتی یانەی چێڵسی لەندەنی ئاشکرا دەبێت.

 ڕۆژنامەی "زە ئەتلەتیک"ـی بەریتانی هۆکاری سەرەکیی ئەوەی مارێسکا لەگەڵ چێڵسی نەماوە ڕوون دەکاتەوە کە بەهۆی ئەنجامە خراپەکانییەوە نەبووە.

سەرچاوەکە ئاماژەی بەوە کردووە، مارێسکا تۆمەتبار کراوە بەوەی بە مەشقی زۆر و تاقەتپڕوکێن یاریزانەکانی ماندوو کردووە، ئەمەش وای لە کارگێڕی یانەکە کردووە لە کارەکەی دووری بخاتەوە، بەڵام سەرچاوە نزیکەکان لە خودی مارێسکا جەختیان کردووەتەوە کە ئەم قسانە ڕاست نین و خوودی ڕاهێنەرەکە خۆی وازی هێناوە.

ڕۆژنامەکە ڕایگەیاندووە، ڕۆیشتنی مارێسکا بە پلەی یەکەم بەهۆی بارگرانی مەشقەکان نەبووە، بەڵکو هۆکارەکە ئەوە بووە کە داوای لێکراوە یاری بە هەندێک یاریزانی دیاریکراو بکات تەنیا بۆ ئەوەی نرخ و بەهایان لە بازاڕی گواستنەوەدا پارێزراو بێت، بەڵام ڕاهێنەرە ئیتاڵییەکە ئەم داواکارییەی ڕەتکردووەتەوە.